Vawiin ni 3.12.2024 hian Mizo National Front, National Executive Meeting chu Aizawl Vanapa Hall-ah neih a ni a, President Zoramthanga’n a kaihruai a, MNF Dan bul ennawna, siamthat ngaite siamthat rem tih a ni a, MNF Party hmalak zel dan tur hrang hrangte rel a ni bawk.
Meetingah hian member thahnem tak kalin, hunserh Dr. Lalzama, Adviser, MNF Gen. Hqrs.-in a hmang a, Report kimchang tak Pu LT Kima, General Secretary hnen atangin ngaihthlak a ni.
Meeting-ah Pu VL. Krosshnehzova, General Secretary putluh Resolution chu lungrual takin a hnuai a mi ang hian pawm a ni.
1. Pu Zoramthanga, President, MNF leh a thawhpui Elected Office Bearer-te kaihhruaina hnuaia tunhnaia hnehna kan chan leh party in nasa taka hma kan sawn zel avangin an chungah rinna leh beiseina kan nghat tlat a ni.
2. ZPM kaihhruai Sawrkarin sum harsatna chhuanlama nasa taka mipuite chhiah leh thil dang tam tak hmanga min run mek laia, Chief Minister leh a thuihruai ten nasa taka an inhaivur lawi si hi kan dem takzet a. Mipui chan hui a, tih retheiha kan awm mek hi a pawi kan tiin, he tawrhna laka chhuak tur hian MNF chuan theihtawp a chhuah zel dawn a ni.
3. Kan unaute chenna ram leh tualchhung buaina avanga sahimna zawnga rawn lutte tuamhlawm kawngah leh an thlavang hauh kawngah Mizorama Sawrkar chu hnam thinlung pu tawklo ah kan ngai a, kan sakhaw humhim nan pawh huaisenna tlachham hle ah kan ngai a ni. MNF chuan hmun hrqng hranga kan unaute tawrhna ṭawmpui leh hre rengin an tan nghet takin kan ding zel dawn a. Kan unaute thlavang hauh kawnga kan MP(Rajya Sabha), Pu K. Vanlalvena’n theihtawp a chhuah thin hi lawmawm kan tiin, kan chhuang takzet a, kan thlawp tlat a ni.
4. Mizoram chhung hmun hrang hranga kawngte a chhe em em mai leh lei dawh mek hna muang lutuk hi mipui ngaihthahna ah kan ngai a, mipui tana ngaihtuahna sen aiin mahni inhaivur leh hlimhlawp lam ringawt kan sawrkarin a buaipui hi lungchhiat thlak kan ti takzet.
5. Chhiah tipung ve lo tur leh sum puk ve lo tura insawi ZPM sawrkarin, inhaivurna atana mipui hnen atanga Ration buhfai man 100% a an tipungte, Stamp duty 200%-a an tipungte, OIL atanga chhiah nasa taka an la te leh, thlatin mai mipui phur tirit zual tura sum a puk awlh awlh reng hi a pawi kan ti a. Heng avanga mipui nitin mamawh thil man pung chho zel kan tuar tlawk tlawk mai hi lungchhiatthlak kan tiin, mipui harsatna phuhruk thin MNF Sawrkar ding leh thuai turin theihtawp kan chhuah zel ang.
6. Duhthala sawrkar sum chinleh tuma, thuneihna pumhmawm tuma, VC term kaltluang lai thawhpui duhlova, thla ruk chuang zet pawt tawi a, mipuiin duh taka an thlan te zahna nei miah lova Democracy an pawngsual hi demawm kan tiin, chhuanlam mumal nei lova buluk taka rorelna kalpui mek ZPM sawrkar kan nei hi vanduaithlak kan ti takzet.
7. Ni 100 chhunga tih tur an intiam tihhlawhtlin an nei mumal lo leh, kum khat dawn an sawrkar hnuah pawh hmalakna mumal hmuh tur awmlo ZPM Sawrkar kan hrawn hi mipuite kan vanduai hle a ni. An insawi anga awmlo, sawiloh ang zela khawsa Sawrkar hi sim a, an mawhphurhna hrechiang tawh turin kan phut a ni.
8. Kuthhnathawktute thlai thar Sawhthing, Hmarcha, Aieng leh Hmunphiah te lei ngei tura nasa taka an intiam laia, lei mumal awm lova, hmangaih leh duhsak bik hlawh tura an sawi te an hawihai mai hi pawi kan ti takzet a ni. An intiamna rate ang ngeia lei sak tawh turin ZPM kaihhruai sawrkar hi na takin kan phut tlat a ni.
9. Sinlung Hills Council Election 2024-ah HPC(R) nen thawhhona tha tak hnuaia hnehna kan chang hi lawmawm kan tiin, Council huam chhung mipuite chungah lawmthu kan sawi a ni. Tluang tak leh tha taka kal turin duhsakna kan hlan a ni.
10. Mizoram mipui zawng zawng te Krismas leh kumthar thlamuang taka, hlim tak leh lawm taka hmang turin duhsakna kan hlan a ni.
