Mizoram Art Development Society buatsaih, Annual Art Exhibition ni li awh tur chu vawiin December ni 3 hian khuallian Pu C.Lalnunkima, MIS, Director DIPR chuan a hawng.
He Art Exhibition hi Lianchhairi Run, DIPR building, Treasury Squareah neih mek niin, Mizoram hmun hrang hrang atangin Artist 54 -in lemziak leh lem tuk 97 lai chu mipui hmuh turin an phochhuak a. He exhibition hawnnaah hian MADS leh I&PR deparment tangkawpin an buatsaih painting competition lawmman semna neih nghal ani a, lawmman hian certificate, sum fai leh trophy a keng tel a ni.
Competition hi category thum a then niin, Open Category, Middle school leh High school a lawmman la pha chin te lemziak chu he exhibitionah hian tar chhuah a ni bawk.
Ni 3 atanga ni 6 thleng awh tur Art exhibition hi nitin dar zing dar 10 atanga tlai dar 4 thleng a tlawh theih a, Mizoram Art Development Society chuan mi zawng zawng chhim turin an sawm a ni.
