Vawiin ni 6.12.2024 (Zirtawpni) hian Congress Thalai chuan kumtina an hman thin Christmas urlawkna hun SibyFarms, Mualpuiah hman a ni a, he hun hi Pu Laltawnliana, President MPYCC, Pu Ngurdingpuia Pachuau, Sr. Vice President, Pu Lalsanglura Sailo, Vice President, Pu Khawpuimawia, Treasurer, Dr. Lalmalsawma Nghaka, Treasurer MPCC leh Pu Siby-a, Secretary MPCC te’n an hmanpui.
He hun hmanpuitu Pu Laltawnliana President MPYCC chuan, Kum 2024 chhungin Congress thalaiin mipui nghawng, mipui harsatna chungchangah hmalakna tam tak a nei a. Mizoram mipuiin a hlawhtlinna pawh an hmu a, Congress Thalai hmalakna avanga lawmthu min hrilhtu pawh tam tak an awm a ni tih sawiin, heng hi kan zavaia tanrualna a ni a, heng hmalakna zawng zawng kan hlenchhuah theihna chhan chu Pathianin hun tha min pek avang leh kan ruahmanna te min tihhlawhtlinsak vang a ni, a ti.
Pu Laltawnliana chuan, Mizoramah party thalai hrang hrang kan awm a, mahse mipui tana theihna zawng zawng hlantu chu Congress thalai te kan ni a. Mizoram mipui pawhin kan chungah rinna an nghat lian ber a ni. Heng hi hruaitu tha, thawhpui tha Pathianin min pek avang a ni, a ti a. Mizoramah mai ni lo, India ramah midangte tana chhawmdawlna hnathawk nasa ber chu Indian Youth Congress (IYC) a ni a. Kum 2020 leh 2022 inkara COVID hrilen laia IYC volunteer-ten midang tanpuia chhawmdawlna hna thawh phei kha chu khawvel fak a hlawh hial a, IYC chu media-ah sawi hlawh ber a ni tawh a, ram mipui pawhin an rin ber chu Congress Thalai hmalakna a ni, a ti.
Congress thalai chu Mizoram mipuite tana rawngbawltu tur leh midang tana inpe tur kan ni. Sorkar tanpui kawngah pawh a tul chuan che chhuak tur kan ni a. Sorkar kal dik tawk lohnaah pawh tumah hlau lova ram mipuite thatna tura thawh hi kan tih zel tur a ni. Mizoram mipui tam zawkin sorkar khalh ngil kawngah min thlawp hle a. A chhan chu ram thatna duha rilru dik pu chunga hma kan lak avang a ni. Congress Thalai hmalakna vangin mipui dikna humhim a ni a, an chanvo humhim a ni hi a lawmawm takzet a ni, a ti bawk.
Headquarters-ah mai ni lovin, Mizoram hmun hrang hranga Congress thalaiin hruaitu tha tak tak Party dang pawhin an awh avanga therhlo leh tawktarh tha tak tak nena an thlem pawh nghet taka ding mi huaisen kan la nei zel hi a lawmawm hle a. Ram leh Hnam hmangaihna tak tak thinlung pua rinawm takin mipui tana awm zel turin ka nge che u a ni, a ti bawk.
Ramin a mamawh chu Thusawi thiam leh mi thawmna aiin mi nghet leh rintlak a ni. Uganda President hlui
Idi Amin te, Iraq President hlui Saddam Hussein te leh Adolf Hitler te kha mi thawm na leh thusawi thiam an ni. Mahse an hun chhungin an ram a ralmuang lova, buainain thla a zar reng a, pawisawi lo nunna tam takin a tuar a, ram eibar harsat hun tawngin mipuiah sum leng vak a tlem em em a. Hetiang hi Mizoram pawhin kan tawn a hlauhawm ta hle. Harsatna chinfel aia zeldin thubawl hmanga sawi mam zel hi kan kal phung a ni mek a, a thei leh a neiin an chawmin an hawp a. Mipuiah sum lengvak a tlemin thil man a sang tawlh tawlh lawi si. Heng harsatna hi Congress Thalai chuan taimakna chhelna, inpekna leh huaisenna nen Mizoram mipui tan kan sukiang dawn a ni, a ti bawk.
Pu Ngurdingpuia Pachuau, Sr. Vice President pawhin thusawiin, Congress thalai chuan Mizoram thalaite hmakhua ti eng turin nasa takin a thawk zel dawn a. Thalaite khawvel thar Mizoram tan kan din dawn a, chumi tur chuan mi tha tam tak kan nei a ni, a ti a. Kumtharah Congress thalai ruahmanna hi kumin aia nasa taka lang theiin kalpui zel kan tum a. Kan innghahna Pathian anih tlat avangin kan zam lova, rim taka thawk chungin thalaite chauh ni lovin mizo mipui tan kan theih tawk kan chhuah zel dawn a ni, a ti.
Congress Thalai Advance Christmas hi Pu Lalsanglura Sailo, Vice President, MPYCC in a kaihruai a. Tv. Lalrindika, Secretary MPYCC in hunserh hmangin, Pu Johan H. Lalmalsawma, Secretary MPYCC chuan kalkhawmte zaiin a awi a. Programme hlimawm tak tak hman niin, mi 80 chuang an kal khawm a, zanriah tui tak kilho a ni bawk.
