Vawiin ni 6.12.2024 (Zirtawpni) khan Golden Hall, Congress Bhawan-ah Congress party chuan Political Session an hmang a, he hunah hian MPCC President Pu Lal Thanzara chuan thu sawi in, “Mi duhawm tak takin kan party min rawn zawm thin a, nimin maiah pawh Silisuri ah mi 90 zetin min rawn zawm a . Mi thiam tak tak leh chhuanawm tak takin kan party min rawn bel chho mek a, heng te hi Pathian malsawmna a ni.
“He enchhin sawrkar, kan ti ang an ti ti lova, kan ti lovang an tih ti leh thin si te chanchin hi sawi a ngai leh thin a. Anni chanchin sawi ngai leh thin hi a inthlahrunawm khawp mai a, amaherawhchu thusawi tur min supply tu ber an ni lawi si a . An pawnfen hi kan hlim san sak lutuk chuan, Zokhua a kuthnathawk tute hi kan ti beidawng lutuk ang tih pawh a hlauhawm bawk si. He ZPM sawrkar hi Congress party in kan duhsakna chu, an intiam ang hian kuthnathaktute thlai thar, an intiam ang ngei hian lei ngei sela, sawhthing te pawh hi lei ngei se, chumi hma chuan an sawrkar hi tla mai lo se, tih hi a ni.
“Hmaniah Power Department changtu Minister in Tuirial Hydel Project chunghchangah Engineer te a dem hle a, CM Political Adviser phei chuan ‘Bomb darh vek ila a ni mai alawm’ a ti a ni awm e. He thu sawi hian Department Engineer, a bikin, Pension tawh te a tihnual hle ni a sawi a awm nghe nghe a . Engineer te hian agreement hi anmahni thuin an signed thei ngawt lova, Department kaihnawih hrang hrang te’n an en fel a, chumi hnuah Law Department in an vetted phawt loh chuan aggreement sign ngawt theih a ni lo a ni.
“Tun hnaiah vaibelchhe sarih man Power Department vekah hian Transformer chhia thlakna tur leina a awm a, Minister hian Tender leh Quotation pawh chhuah lovin direct in Kolkatta a mi Manufacturer supply a pe, tiin mi pakhatin min hrilh a. ‘Chutiang te chu a awm thei dawn em ni le? Power Minister hi mimal taka ka hmel hriat tha a ni a, a dept chan chanchin hi a chhe zawnga sawi fo ka duh lo’ ka ti a. A ni chuan MRT, Power Department Godown, Zuangtuiah sawn Transformer pawh a thlen teuh tawh thu a sawi a. Nimin lawkah kan thalaite an va kal a, thla te an va la a, a siamtu company hming te pawh a lang a ni. Chuta chuang ngei ngei tur ISI Mark a chuang lo a! Minister hian a duhsak a, supply hna hi a pe anih pawn ISI Mark chuang ngei, hmantlak kan duh a ni ti se, a tha tur a nia. Hetiang thil hi a tak tak anih a, an insawi thianghlim anga an awm leh si lo anih chuan, an khawngaithlak ka ti ngawt ang. Congress hi Pathian leh mipuite zara kan sawrkar leh anih chuan, hetiang hian kan ti ve lovang.
“ZPM sawrkarin sawhthing an lei mekah pawh hian Congress Party chuan mit kan chhit kar a ngai dawn a ni. Anmahni party mi hlir society ah an indah a, sawhthing kg khat ₹50 in kan lei ang, an ti a, mahse ₹42 in an lei tih thawm te kan hria a. Heting thil hi Congress chuan kan en liam mai mai dawn lo a ni.
Kan hotute inthurual taka ke pen mek hi, party mipuite hian thlawp tlat ila, mi tha tam takte luhna tlakah kan party hi siam turin ka sawm a che u.” a ti.
Pu Lalhmingmawia, General Secretary, MPCC pawhin thu sawi in, “Kan ram hmasawnna hi politic ah a innghat a ni. Congress sawrkar laia kan ram sum leh pai dinhmun kha a tha a, mahse vanduathlak takin kan tla a, tun dinhmun hi kan thleng ta a ni. NLUP khati zat kan sem chung khan sum harsatna a thlen phah lo a ni.
Enge kan Politic khelh chhan te hi kan ngaihtuah a ngai a, ram hmangaihna tak tak nen politic kan khel tur a ni. Minister leh MLA nih te hi kan chak thin a, intihropuina leh inchhuanna tur a ni lo. Mawhphurhna sang tak a kengtel tih kan hriat a ngai a ni. Kan mawhphurhna kan hlen chauhin kan inchhuang tur a ni.” a ti.
He Friday Session hi Pu Lalhruaitluanga Bawitlung, General Secretary, MPCC chuan a kaihruai a, Dr Henry Zodinliana Pachuau, States Co-ordinator, AICC leh Pu Lalhmingthanga Pachuau, President, ADCC ten report ngaihnawm tak an pe bawk a ni.
