December 11, 2024 Nilaini hian Aizawl District Congress Committee chuan Congress Bhavan-ah MEDIA TRAINING hun an hmang a. MPCC Treasurer Dr. Lalmalsawma Nghaka leh Dr. Lallianchhunga, General Secretary ten an hmanpui.
Hun hman puitu Dr. Lalmalsawma chuan, “Congress Party hian Manifesto kan siam reng reng hian, kan tih hlawhtlin theih ngei ngei loh tur kan siam ngai lo a. Kan manifesto-a kan dahte hi zir chian sa a ni zel a, AICC-a mithiamte leh Mizoram leh India ram hmun hrang hranga mithiamte rawnin, a road map uluk taka duang lawkin hma kan la thin a ni.
ZPM leh MNF ten zir chian tak takna awm lova mipuite hnenah an tih hlawhtlin theih miah loh tur mumang an zawrh thin ang hi kan ram mipuite tan a him lo va, beidawnna thlentu mai a ni thin tih vawiin ni-ah a lang chiang hle a ni.” a ti.
Dr. Mala chuan, “Health Care chungchang ringawtah pawh hian Congress Sawrkar lo that zia leh, a hun takah mipuiten an health care bill an la zat zat theih thin kha vawiinah chuan dam lo mangang ten an chhui letin an ngai vawng vawng a ni. MNF Sawrkar khan Health Care Bill kha a kum a kum mipuite an bat sak thin a, mipui an mangang hle a nih kha.
ZPM a rawn sawkar ve leh a, Research based-a kal inti si in, thla 6 an sawrkar hnu-ah October atanga March 2025 atan Health Care Bill hi chhungkaw khat tan cheng nuaih 1 an rawn ti thei hram ta chauh a, natna khirkhanin a tlakbuakte tan a beitham hle a ni.
Tuna kan sawrkarin Mizoram Universal Health Care Scheme atana Asian Development Bank atanga pawisa puk a tum hi vaibelchhe 1004.64 niin, 80% (Vaibelchhe 799.22) hi Loan Portion niin, a bak zawng vaibelchhe 205.22 hi State Counterpart Funding tur a ni. He Loan hi Sawrkar Laipui-in Grant to State hmanga a rulhpui hnuah pawh, cheng Vaibelchhe 79.92 hi Mizoram Sawrkarin a la rulh tur a ni,” a ti.
MPCC Treasurer chuan, “Inthlan hmaa Sawrkarin Loan a lak, duh lo em em leh, tha ti lo em em thinte khan vawiinah chuan Sawrkar kal tawh zawng zawngte aiin sum an puk a tam chho mek a ni.
Sorkar sum ti hek zawnga facilities leh hlawh ti pung thur thurte hian Congress-in NLUP kan kalpui, mi harsa ber te hnena cheng nuai 1 lut kha sem an ti a nih chuan mi rethei zawkte tham lohna a ni. Kan enchhin sorkar, tha bik tura insawite hian MNF sorkar kha an tluk lo a, Congress sorkar phei kha chu tluk lo tak a ni tih report atangin a lang chiang hle a ni.” tiin a sawi.
MPCC Treasurer Dr. Mala’n Media chungchang sawiin, “Media zahawm tak hi ram hruaituten thudik tawk lo leh thu belhchian tawk lo sawi mai mai nan an hmang thin hi a pawi hle, kan ram mipuite hian thudik tak an hriat hi an dikna chanvo a ni tih hre nawn se ka duh hle a ni,” a ti bawk. Dr. Lalmalsawma Nghaka hi Executive Master in Media and Journalism-a degree nei a ni.
He training programme-ah hian Dr. Lallianchhunga pawhin thu sawiin, “Congress party hian nasa takin hma kan sawn a, kum 2028 ah hian sorkarna siam ngei turin hma kan la a. Tunlaiin RTI hi a tangkai hle a, heng hi hmang tangkai ila, ram leh hnam tan a ni tih hriain kan hriat duhte hi RTI hmangin sorkarah zawhna zawh zel hi mitin mawhphurhna a ni.” tiin a sawi bawk.
He training program hi ADCC President Pu Lalhmingthanga Pachuau-in a kaihruai a, member thahnem tak an kal a ni.
