Vawiin khan Mizo Students’ Union (MSU) chuan Aizawl Press Club-ah chanchinthar lakhawmtute kawmin an president Lalkhawngaihzuala chuan, “Kum 2023-24-a Mizo zirlaiten scholarship kan dawn tur chu tunah hian 1st leh 2nd Installment sem zawh a ni tawh a. 3rd Installment hi buaipuiin, Mizoram Scholarship Board Secretary Dr. PL Ramliana chu Delhi-ah a thang mek a. 3rd Installment ministry lama an dil mek ₹806 Lakhs pawh hi a rang lama sem chhuah leh thuai a nih theih nan MSU chuan a vil zui reng a. Tunah hian zirlai la dawng lo Post Matric-ah zirlai 5450 leh Pre Matric 1155 an awm mek a. Scholarship board thawktuten theihtawpa hma an laknaah MSU chuan lawm thu thinlung takin kan sawi a. A bik takin State Nodal Officer-in MSU te min thawhpui ṭhatnaah lawm thu kan sawi a ni,” a ti.
MSU President chuan, “Scholarship board ten theihtawpa hma an lak laiin, school ṭhenkhat a scholarship khawihtu Institution Nodal Officer te inthlahdah vanga Zirlaiten an scholarship dil an dawng lo tur hi a pawi kan ti hle a. Tunah hian Cherhlun Higher Secondary School (Adhoc)-a zirlai scholarship dilte chu an Schoolin verification an tihsak loh avangin Scholarship kumin hian an dawng thei dawn lo a, MSU chuan hei hi pawi kan tiin a thawktute kan dem tak zet a ni.
“Hrem ngai an awm a nih chuan a ṭul anga hremna min lekkawh sak turin sawrkar thuneitute kan ngen a. Tin, thu kan dawn danin Lungrang ‘S’ High School (Adhoc)-a thawktute chuan scholarship buaipui an thiam loh chhuanlamin an zirlaite tan an buaipui thei lo niin kan hria a. Zirtirtu naupangte tana intuaithar peih tawh lo leh ngaihsak peih tawh lo an awm hi pawi kan ti tak zet bawk.
“Zirlaiten an hamṭhatna scholarship an hmuh theih nana hma min laksak turin Mizoram sawrkar thuneitute kan ngen a. Tin, Zirlai Scholarship dil duh, an Institution thawktute lamin an buaipui peih si loh hria kan awm a nih chuan MSU General Headquarters hruaitute hnenah report turin kan inngen a. A ṭul angin a tawp thlengin MSU chuan Zirlaite hamṭhatna atan ke a pen dawn a ni.
“Scholarship hi Class IX leh X zirlaiten Pre Matric Scholarship an dil thei a. A chung lampang zirten Post Matric Scholarship an dil leh thei bawk. Zirlai zawng zawngte Scholarship dil vek turin kan inhriattir a. A dil dan thiam lote tan MSU General Headquarters chuan Scholarship Help Desk MSU Pisapuiah kan buatsaih a. Mizo zirlai scholarship dil thiam lote chuan MSU Scholarship Help Desk hi hmang ṭangkai ṭheuh turin kan insawm a ni. Dil hun hi 14th December, 2024 thleng chauh a nih avangin, scholarship dil thei chin zawng zawngte chuan hun tlemte a la awm chhung hian lo dil ngei turin kan insawm e,” a ti bawk.
