Vawiin April ni 26, 2022 (Thawhlehni) hian ‘MNFTuipui South Block-III Political Training’ chu South Vanlaiphai Community Hall 2-ah neih a ni a. He hun hmanpuitu bialtu MLA Dr.R.Lalthangliana Minister chuan South Tuipui Block-III huam chhung khaw hrang hrang S.Vanlaiphai, Muallianpui leh Lungpuitlang atangin Congress leh ZPM party mi voters 121-te chu MNF-ah a lawmlut. Lawmluhna thu sawiin, “Vawiinah mi thar heti zat Mizo hnam party-ah kan inlawmlut hi lawmawm ka ti hle a. Pathian leh mipui zarah nakum kum tawp inthlanah MNF hi a sorkar leh ngei dawn a ni,” a ti.
Health Minister chuan, “North East-a lian ber tur Cancer Super Speciality Hospital pawh Japan mithiamte nen kan Chief Minister zahawm tak Pu Zoramthanga hovin kan meeting tawh a, kan senso tur chu cheng nuai singruk vel a ni ang, tunah chuan Mizoram sorkar leh Japan sorkarin kan kutken tan dawn ta a ni. Nimin lawkah Bangladesh Union Commerce Minister Pu Tipu Munshi leh an palai mi 9 zet an lokal a, Kawrpuichhuah border trade tipuitling turin hma kan la, a hungna tur pawh kan thawk tan tawh a ni. Metre 600 chuang zeta thui Leidawh nan cheng nuai 4000 kan ruahman a, chubakah Lawnga inkalpawhna tur te kan enfel bawk. Bangladesh-in an mamawh em em lung, teak, rawra, mau, aieng, hmarcha-te kan ram atanga chawkluh an mamawh hle dawn a, hei hian nasa takin kan economy a chawikang dawn a ni. Covid-in rei tak min chenchilh hnuah sikul kal theiin, public meeting-te kan nei thei ta a, hna tak tak kan thawk thei dawn tan ta hi lawmawm ka ti hle a ni. Covid kha chu awm lo se, kan hnathawh hi lang theiin a tam tawh ngawt ang. Hmannia Delhi ka zu kal khan henglai Lui lian intlawhpawh zung zung theihna turin Union Minister Sonowal pawh Lawng changkang deuh chi min pe turin ka dil a, a hmunhmate an rawn endik tawh a, min pek thuai ka beisei a ni,” a ti.
Health Minister Dr.R.Lalthangliana chuan, “SEDP hi kan ti mek a, kan la tih chhunzawm zel dawn a ni. Health department-ah post ruak 3000 chuang a awm mek a, a tul ngawih ngawih leh pawimawh bik chu Chief Minister hovin Finance leh DP & AR-te nen ngaihtuahna sengin kan la sawiho dawn a, hnawhkhah kan la tum a ni. Sub-Centre 371 zet chu kumin hian Health & Wellness-ah hlankai zawh hman kan inbeisei a ni. USA-a ka zu bawhzui cheng nuai sing hnih chuang pawh Health department tihchangtlunna tur pawh nakin lawkah a hlawhtlinna hmuh thuai kan inbeisei a ni,” a ti.
