Dated Siaha 28th January, 2025 :
Vawiin khan ZPM Mara District Headquarters Office, Siaha ah mithar lawmluh inkhawm neih a ni a, he hun hi Pu KH Beithie, President ZPM Mara Dist. Hqrs in a kaihruaia, Rev B.Beihlua (ECM) in hunserh a hmanga Pu Lalliansawta, Preseident ZPM Gen. Hqrs in mithar 835 ZPM ah a lawmlut a ni.
ZPM President Pu Lalliansawta chuan, “Tun hmain zofate hi lo neiha eizawng kan ni a, intodelh taka hun kan hman laiin mau tam leh rambuaiin min nang chho a, kan ram chu retheihna bawihah kan lut ta der mai a ni. Chutih lai takin India Sorkar hnuaia kan awm chhoh tak avangin Central atangin ram hmasawnna tur Sum leh pai a lo luang lut ta a, reitheihnain min chim mek lai a nih avangin Sem sem dam dam eibil thi thi ti thin hnam chu, mahni tanghma haina rilru in kan thinlung a luah chho ta a, chutiang chuan kum 40 dawn hun kan lo hmang ta a ni. Pathian hun ruat zelah ZPM Party kan lo lang ta a, kan ram rorelna a Pathian ram tungding leh turin vawiin hian Pathianin min ruat mek a ni. Chutianga Pathian hruai mek Party zawm thar duh Pathianin min pe zel hi kan lawm hle a ni,” a ti.
Lunglei East Bialtu MLA Pi Lalrinpuii Health Minister pawhin thu sawiin, “Health Department hi hi Department lian tak a ni a, tun hmain hruaitu thenkhatten politics khelh nan an lo hman thin a vangin, department chhungah thil siamremm ngai leh hmalakna tur mipui nghawng thil atam hle a, hmun thenkhatah Subcentre, PHC, CHC kan enkawl zawh bak leh function theih si loh an lo siam duah mai a, chu chuan thawktu indaih lohna a thlen nasa hle a, kihhnawk tam tak min hnutchhiah a, kan thianfai mek a ni. Tunah hian district hospital tinte kan thuam chak mek a, an hmanraw mamawhte pawh CSR leh IOC kaltlang tein kan ngaihtuah mek a ni. Siaha District pawhin malsawmna thar in dawng dawn a, kalphung thar mipui Sorkarah he district hian kawng hrang hrangin hma a sawn mek a ni. Ruihlo hian kan ram min ti buaia Sorkar thar chuan mutmawh hnarmawhah neihin Ruihhllo laka kan thalaite an lo fihlim theih nan tihtakzetin Social Welfare dept kaltlang pawhin hma kan la mek a, Tourism lamah pawh Siaha District hmasawnna tur hian ngaihtuahna kan seng mek bawk a ni,” a ti.
He hunah hian Pu C.Lalnunnema Vice President ZPM Gen.Hqrs leh Pu T.Lalhlimpuia Lunglei West Bialtu MLA ten thu an sawi bawk a, GAD, GS Pu PB Lalsawmliana’n inhmelhriatirna hun a hmanga, Pu H.Vanlalhlua GS, Minorities leh Pu TBC Lalthanmawia GS, Media Dept. te bakah Siaha District Hqrs hruaituten an tawiawm a ni.
