MNF Vice President, Leader of Opposition Pu Lalchhandama Ralte chuan thlan tlin a nihna Tuivawl bial fangin hun a hmang mêk a, nimin khan Mauchar, Palsang leh Zohmun tlawhin, vawiin khan Zokhawthiang, N. Ṭinghmun, Upper Sakawrdai leh Sakawrdai te a tlawh.
He hunah hian Pu Lalchhandama Ralte chuan VC inthlan lo awm tûrah MNF chuan hnehna sâng tak chan tumin hma an lâk mêk thu sawiin, state-a rorêlna changtu ZPM chu a thlang tlingtu mipuiin an nin ṭan mêk thu a sawi. Pu Chhantea chuan, “Sorkarin kawng siamna tûr tiin road tax a ti sâng a, oil man an tisâng bawk a, an cess lâk chu kawng siam nan kan hmang dâwn ti reng chung siin kan supply line kawng a la chhe êm êm reng a ni. Chu mai ni lovin, buhfai man a lêt thawkin an han tisâng a, kan hnianghnar phah lêm lo. MNF sorkar hun lai, buhfai man ₹ 15/- a nih lai khân buhfai kudam te a khat tlângpui a, vawiinah chuan ration la tûr khaw hrangten an nghâk rei ṭhin hle a, tun dinhmunah khuarel chhiatna rawn thleng palh thut ta se, ṭâm hmachhawn thei reng dinhmunah kan ding mêk a ni. MNF sorkar hun lai khan ration buhfaiah kan hnianghnar hle a, dah hmasate a chhe hman ang tih hlauhawm khawp a ni ṭhin.
He sorkar kan hrawn mêk hian leiman, chhiah hrang hrang an tipung a, harsatna hrang hrang kan tâwk mêk a, a theihna apiangah mipui min sawrfu mêk a ni, a ti.
A sawi zêlnaah MNF Vice President chuan, MNF sorkar khân kan ram hmasâwnna kawng tam takah a thlen a, ZPM chuan zirtirtu indaih lohna pawh dah belh aiin, a awmchhunte pawh min sawn chhuah sak chur chur zâwk a ni, a ti bawk.
