Aizawl, April 27 : Vawiin chawhnu khan ICICI bank hotute chuan Raj Bhavan-ah Governor Hari Babu Kambhampati an hmu a. He inkawmnaah hian Pu Vikas Mathur, Zonal Head, ICICI Bank chuan Mizoram chhunga ICICI bank hmalakna hrang hrang leh an hmachhawp te sawi fiahna hun a nei a ni.
Governor Hari Babu Kambhampati chuan commercial bank te Mizoramah an rawn luh belh zel chu tha a tih thu a sawi a. Hetih rual hian Bank lam te pawh hian mipui tana an tihtur tam tak an tih ve a tul a ni a ti. Mipui hnena pawisa pukchhuah tir chungchangah te, hmun danga bank customer ten hamthatna an neih ang te helai hmuna pek chungchangah te, central welfare schemes tha tak tak te customer te hriattir chungchangah te Mizorama bank ten tan la zual zel se a duh tih a sawi bawk. Corporate Social Responsibility kaltlanga mipui rawngbawlna leh vantlang tlana rotling siam kawngah ICICI bank pawhin theih tawp chhuah se a duh tih a sawi a. Governor chuan Bank dangte nena inkawmna an lo neih tawhnaah Mizoram mipui tam zawkin Central Sawrkar hnuaia an hamthat theihna scheme tam tak te, hriatlohna avangin an dawnglo tih a sawi thin thu a sawi a. Bank official ten an customer te chu central welfare schemes te zawm turin an tur lui thei lo nachungin central welfare scheme tam tak a awm thu te leh a thatna te an lo hrilhriat chu mawhphurhna pawimawh tak a nithung si a ni a ti.
Pu Vikas Mathur, Zonal Head, ICICI Bank chuan Mizoramah ICICI Bank in tha takin Banking an kalpui a; tunah hian Aizawlah Branch pathum leh Champhaiah Branch pakhat an nei mek tih a sawi a. Branch thar Kolasibah hawn thuai tum a nih thu sawiin district dangah te pawh hawn belh zel an tum tih a sawi a ni. Pu Vikas chuan ICICI Bank chu mipui rawngbawlna kawnga an mawhphurhna te ngai pawimawh em em a ni tih a sawi a. Covid-19 avanga kum 2 chhung CSR duh anga an kalpui theih loh hnuah a bul tan nan Aspirational District – Mamit District atangin CSR huanga hmalakna kalpui a ni dawn a. Mamit district a beneficiary thlanchhuah te chu Poutry Farming leh Agriculture and Allied activities ah te an pui dawn tih a sawi a ni.
Governor leh ICICI Bank hotute inkawmnaah hian Pu Partha Das, Regional Head leh Aizawl Branch hrang hranga ICICI Bank hotute an tel a ni.
