January 31, 2025 (Zirtawpni) hian Mizoram Pradesh Congress Committee chuan Congress Bhavan, Aizawlah Friday Political Session leh Lawmluh Programme an hmang a, mithar tha tak tak mi 208 lawmluhna a nei nghal a ni.
He hunah hian MPCC President Pu Lal Thanzara chuan thu sawiin, “Politics ah dawt a leng lo, dawt sawi thin mahse an tlu leh mai thin. Dawtin kan hotu ten min hruai ve ngai lo, kan ti ang an tih chu an ti zel thin tih an hriat avangin ZPM party atangin Congress ah an lo lut a ni.
“He sorkar (ZPM) a beidawng a Congress kan lawmluh vanga kan lawm em em laiin, kan mithiam, University a kan professor rual te pawh he ram tluchhe mek chhanchhuak tur hian Congress a lo lut turin ka sawm a ni.
“Politics ah hian dawt a leng lo a ni. Tum eng emaw zah Chief Minister ni tawh pawhin peace bonus te pawh, ‘ka ti mai mai a nih kha’ tiin rorelna hmunah an sawi leh duh zel a.
“Campaign laia Thenzawl khawpuiah ka siam ang a, Central in min pui duhlo a nih chuan millionaire kan hmang ang tia intiam te, chutiang mai mai chuan kan ram hi kan hruai a, chutiang mai mai chu kan zui zel dawn a nh chuan kan hmalam hun a thim viau ang.
“Congress party hotute chuan rambuai karah min thlantlin chuan remna leh muanna kan thlen ang an tia, term chanve ah remna leh muanna an thlen a ni. Kan sorkar chuan cheng singthumin bul kan tanpui ang an tia, rangva kan sem ang an tia, an tihlawhtling vek a, NLUP pawh tiam angin mirethei khaichhuah an an sem a, kan hotu ten dawtin ram an hruai ve ngai lo.
“Kan hotute kaihhruaina hnuaiah kan ramin malsawmna tam tak a tawngbua a. Mizo mipuite hian tawngtam thiam hmui mistiri ringawt hi kan ngaihsanloh a hun tawh a, thil tih tak tak tum an thlir thiam a ngai tawh.
“Kan thalai te pawhin uluk taka chhut leh ngaihvena tuna kan hrawn mek te pawh hian eng nge an thlen dawn tih an chhut a ngai a. He sorkar mekah hian beisei a sang lo hle in ka hria.
“Congress party in ram rotling kan siam Tuirial Hydel project te, Lengpui Airport te, medical College te hi ZPM party hian enkawl thiam lovin rihral an tum mek a ni.
“Medical college kan neih chhun pawh central hlan mai an tum a, central in kan lo enkawlpui ang che u an tia, an hlan lo mai a ni. MNF in medical college hming an thlak a, ZPM in a hming an thlak leh a. Pathian leh mipui zarah kan sorkar leh a, kan hotu ten rem an tih chuan a hming ngai Mizoram Institute of Medical Education and Research (MIMER) tiin kan thlak leh ang. Medical college ringawt nilo Research tih nana kan din a ni.
“Congress sorkar lai khan Lengpui airport IAF hnenah hlan an lo tum ve tawh tiin an sawi thin a. Kum 2015 ah Congress sorkar laiin kan Governor MM Lakhera khan IAF a hlan a that ringin lehkha a ziak a, chumi dungthul chuan Chief Minister pawhin lehkha a ziak a. Mahse, karkhata hnuah Chief Minister in a lehkha ziah chu a sut leh nghal a ni. Governor in a rawtna chu, ‘a tha ang a’ an tih kha, a thatloh tur zia hrechhuak lehin an karkhat chhungin an sut leh a ni.
“ZPM sorkar hian ram rorelnaah pathian ram thlentir an tum thu an sawi a. Mahse, tunah hi chuan Pathian ram ni lovin ZPM ram an thlentir mek a ni.
“Kan airport neih chhun te min hralhsak hma in ZPM hi kan hralh vat a ngai a ni. Kan ramah sum leng vak a tlem em em reng a, kumin Krismas kha ruaitheh tlem ber tum an ti a, sum leng vak a tlem tlat a, sumdawng te pawhin inhralh a har an ti a ni. Eng vang nge kan tih chuan sawhthing lei nan sum an dahtha a ni. Sawhthing lei nana development sum an dah tha a nih chuan a hriatthiam theih mai a. Mahse, Central BJP te duhdana an awm hma chuan pawisa puk ngaia an buai an buai a ngai. Chanchintha thehdarh khaptu te nena inzawm reng chung hian kan ramah Pathain ram an thlentir ka beisei lo a ni.
“Ringtu kan nih a, Kohhran mi kan nih chuan kan ram, kan hnam, kan sakhua a him nan Congress lo hi chu party dang a awm lo a ni. Congress tihloh party zawng zawng hi BJP sum hmang lo an awm lo. India rama chanchintha hril khap tute BJP party te sum an hmang tih hi khawvel hriat a ni. BJP pawisa hmang lo awm chhun chu Congress te kan nia. Mizo, ringtu, kohhran mi kan nih bawk chuan Congress a awm hi a inhmeh a ni.” a ti.
He Friday Political Session hi Pu F. Lalhmangaiha, General Secretary, MPCC chuan a kaihruai a, C. Lalhriatpuia, Secretary, MPCC chuan report a pek bakah hruaitu hrang hrang ten zin report an pe bawk.
