Khawzawl, Date 27.2.2025 : MNF President, Pu Zoramthanga chuan February ni 25, 26, 27 chhung hian Champhai, Samthang leh Khawzawl khua te a tlawh a. Heng hunah te hian Party mipui kalkhawm hmaah “MNF chu harsatna tuar chhuakin a tho leh ṭhin a ni,” a ti.
Pu Zoramthanga chuan, “MNF hi in hrechiang lo vang tih ka hlau va. Harsatna engemaw a lo thlen hlek hian a ṭhen chu an zâm palh fo mai. Nimahsela, Pathianin a hun takah min hûng chhuak leh mai zel a ni. MNF chu huaisen takin a ding reng a; ram leh hnam tana beitu, mahni nunna hial pawh thâpa thawk ṭhin a ni a, zâm ve mai tur kan ni lo.
“Hotute sitna te, demna leh deusawhna, hmuh tlin lohna te hi underground hun lai aṭangin kan tawk tam tawh. Mahse, tling lo leh famkim lo chung pawha Pathianin a kaihhruai Party nghelnghet ber chu MNF hi a ni a, kum 64 Pathianin min hruai tawh a ni,” a ti.
Zoramthanga chuan, hetiang hi kan nih avangin kawng lakah Pathianin min kalsan lo vang, a ti a. Pu Zoramthanga chuan, MNF dintu, kan founder president Pu Laldenga a awm loh hnuah MNF chu ral zui mai turah an ngai, mahse, a awm loh hnuah kum 15 chhung sorkarna kan siam thei, keini pawh kan liam hun a awm ang, kan liam zel ang a, mahse, MNF chu ‘Pathian leh kan Ram tan’ a dingnghet tlat thung ang. Ṭhangthar hruaitu ṭha tak tak an lo chhuak zel ang a, MNF chu Martar te thisena lei a nih vangin kehchhiat emaw rauhsan a tawk ve lovang a ti a, Party dang te chu an ral vek tawh a, an ral zel a, an ral mêk bawk a ni, a ti.
MNF President chuan, Tunhmaa MNF in kan ngam loh lian ber chu Mizo Union an ni a. Mahse, an ral vek tawh. A hnua kan ngam loh ṭhin chu PC Party a ni leh a, tunah chuan an ral leh tawh. Congress pawh er tham an awm tawh lo, anni hi Central (Delhi)-a innghat an ni a, khulam an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni leh tawh, a ti.
Kum 2023 inthlanpuiah engati nge MNF kan tlak? Engati nge ZPM an chak viau kan ti a. Hei hi, Pathianin tum a neih vang a ni tih hi kan pawm a ngai a. Chu chu kan inṭawng thlamuanna emaw, kan inhnemna ṭawngkam a ni lo. ZPM hi Pathianin Sorkar tir a duh chhan hi kan ngaihtuah zawk tur a ni, a ti. Pu Rama chuan ZPM chu Ṭiau vut chunga In sa, Chirhdiak chunga In sa ang lek an nihna zawng zawng kan hrechiang tur a ni, a ti a.
Kalphung thar an ti a, Mahse, kum khat chhung lek an sorkarah pawh thil mak leh mipui beidawnna, sorkara la thleng ngai lo leh tih ngai loh a thleng tam em em!. Heng zawng zawng hi chung lamin ZPM nihphung dik tak mipuite hriatchian tir min tumna hmanrua a ni. Engkim zir lawk leh hrechiang sa, ‘research base’-in kan kal dawn, an ti a. Sawhthing lei dan aṭang ringawt pawhin, an hotupa ber a mangang nghal a, inkhualtelem sorkar an nih dan zawng zawng kan hmu fiah chho zel a, îtawm bera insawi kha a letling thawk an nih zia kan hmuchiang zel dawn a ni.
Village Council leh Local Council inthlanah reng reng, Congress sorkar leh MNF sorkar kan chak vung vanglai chuan VC/LC kan la fai deuh vek zel a. ZPM ah chuan an phur ber laiin thla 6 zetin inthlan an sawn hma a, chuti chung pawhin ruling laia che chhe ber sorkar an ni, a ti. Kal ngaihna an hriat loh luatah Zu zawrh nge, BJP zawm tur..?? tih hi an bûk vel mai mai a ni ber tawh a. Heng hian MNF lo chu he ram tana ding chang leh tur a awm lohzia a entir a ni. Pathianin a chanchinṭha hril a, puang chhuak tur leh he rama rorel leh tur hian MNF hi a hun takah min la chhuak leh dawn a ni, Pu Zoramthanga chuan a ti bawk.
