Mizoram sawrkar hnuaia a hnathawk zingah aikal lo la la an awm a nih chuan, anmahni leh a thawhna officer chungah hremna lek a ni dawn tih GAD changtu chief minister Lalduhoma chuana sawi a, hetihlai hian hnathawk aikal la an awm sawrkarin a hre tawh lo niin a sawi bawk.
MNF member R Rohmingliana zawhna leh member dangte zawh belhna chhangin vawiin khan (3.3.25) assembly budget session-a zawhna leh chhanna hunah GAD changtu chief minister Lalduhoma chuan, sawrkar hnathawk aikal lak chungchang-ah grace period an siam tih sawiin, “Insiamrem turin kan ti a, chumi a pelh a man chhuah te chu action lak tur kan ti. Aikal la an lo la awm a nih chuan anmahni leh a thawhna a officer lo chhawrtu, an pahnih chungah action kan la ve ve tawh ang, hei chen hun kan hawng tawh a, chu pawh zah lo a lo la tilui an awm a nih chuan hremna an tawh ang angah an phunnawi thei lo ang,” a ti bawk.
Aikal lak chungchangah inhriatthiamna a awm lo tih sawiin, chief minister chuan, department tinah service review committee din vek tura tih an nih tawh thu sawiin, “Chungte chuan an department theuh a hnathawkte, eng vang pawh a an hna thawk chhunzawm lo te tan special valuntary scheme a buatsaih sak a, chumi hnuaiah chuan thawk thei lo chu an chawl mai tur a ni,” a ti a. “A pawng a pui inban kan tum lo a, rilru nuam taka an chawlh theih dan kawng hawn sak an ni,” a ti bawk.
