Mizoram Police chuan thuchhuah siamin, “Tunlaiin Lengpui Airport atanga zin chhuak tur zingah phalna nei loa silaimu keng Lengpui Airport-a man kan awm fo mai a. Hemi kawngah hian phai lama zin turte fimkhur turin kan inngen a ni,” an ti.
Thuchhuahah chuan, “Sual vang pawh ni lo, fimkhur loh vanga silaimu emaw lo ak palh te pawh License nei lo kan nih chuan dan (Arms Act) hnuaiah thubuai ziah luh (register) a ngaih phah thin a, hemi avanga thubuai kan neih theihna laka kan him theih nan silai leh a mu (Arms & Ammunition) kawl reng rengin danin a phut angin License kan nei ngei tur a ni.
“Lengpui Airport atanga zin chhuak tur reng reng mahni in kan chhuahsan hmain kan bag, thawmhnaw leh thil dang kan ken tur te uluk taka endik hmasa vek turin kan inngen a. Tin, hei bakah midang bag emaw parcel emaw kan kensak dawn a nih pawhin Airport thlen hmain uluk takin a chhunga awmte endik hmasa thin turin kan inngen e,” an ti bawk.
