Vawiin 3rd March, 2025 (Thawhṭanni) hianb BJP Mizoram chuan Kkrthar Inhlanna leh Political Session neiin, Pi C. Lalbiakkimi, State Mahila Morcha President-in inkhawm a kaihruaia, Pu Vanupa Zathang, IPS (Retd), State Vice President-in hunserh hmangin, Pu Vanlalhmuaka, State President-in thusawina hun a nei bawk.
Pu Vanlalhmuaka, BJP Mizoram State President chuan, “Mizoram hian hmui leh thu chauh va politics kan buaipui hi hawisan a, thil tih a politics kan khelh tan hi a ngai tawh a ni a ti.
Pu Hmuaka chuan, “Tun hnaiah Lengpui Airport chungchang hi sawi a tamin Politics Ball atana hmang Politician-te kan awm bawk a, nimahsela a kalkawng tur dik tak zawk chu Union Minister rawn zin khan a rawn puang a, Lengpui Airport hi Mizoram Sorkar chuan a enkawl zo loh laiin, Lengpui Airport chei ṭhatna tur sum Central Sorkarin an dah thu kan tuallai ah a rawn puang thung a ni. Kan Airport hi hlawk zawk leh ṭha zawka, tihchangtlunna tur sum lak chhuahna turin Mizoram Sorkar hian ruahmanna siam a, a tul anga central sorkar Pu Modia kaihhruai hi a dawr ngam a ngai a. Development hna thawhna turin Pu Modi a kaihhruai Central sorkar englai pawhin a inpeih reng a. Mizoram Sorkar hian Central sorkar hi hlau chungin dawr lo sela, a kalkawng dik taka dawr tur leh chutianga an dawr a nih phawt chuan Central sorkar puihna kan hmuh ngei a rinawm a ni,” a ti.
Pu Hmuaka chuan, “Lengpui Airport kalkawnga Buichali Lei dawh mek chu an siam chhung a rei ta hle mai a, Kum 2012 aṭanga sum pek ni tawh vawiin thlenga siam zawh a la ni lo chu, tun hnaia Union Minister lo zin, Ministry of Road, Transport & Highways changtu Pu Harsh Malhotra chuan mak a ti hle a, zawhna min zawh phah hial a ni. A ram chhung mi te ai maha pawn lam aṭanga min veitu an awm hi a zia lo hle a, Chuvangin a ram leilung fa te leh kan state sorkar hi Development hnathawhna kawngah kan inenfiah a ngai a; tun ang renga kan kal a nih chuan kan tu leh fate tan awmna tlak lo leh khawsak harsatna State ah kan siam mai ang tih a hlauhawm hle in, Mizo mipuite hi kan inphun lungawi leh mai mai ang tih hi a hlauhawm takzet a ni a ti.
Pu Hmuaka chuan sawichhunzawmin vawiin ah chuan kan North East State pui dangte pawhin Development kawngah min kalsan thui ta viau mai a, Kan ram mamawh kan hmuh nan hian Sorkar tawhte leh Sorkar mekte pawh hian tih takzet hian hma an la tawk lo hle ah ka ngai a, Central ah hian Mizoram tana hmasawnna hna thawhna tur hi a awm a, chu hmasawnna hnathawhna tur chu hai chhuak tur hian State sorkara hnar kaitute kan taihmak a ngai tak zet zet a ni. Vikshit Bharat 2047 thlen tir tura hma latu Pu Modia kaihhruai sorkar hian Vikshit Mizoram 2047 pawh thlen tir a tum a ni tih hi Mizoram enkawltura thuneihna kan pekte hian kan hriat a, buhzel bula tamchhawla let reng lovin, insangmar leh teh ang u a ti bawk.
