Aizawl April 29 : MADC Election Campaign a zinchhuak mek ZPM hruaitute chu theihtawp chhuahin an campaign chhunzawm zel a. Nimin April 28, 2022 khan Siaha South -I ZPM official candidate Pu NT Lalringliana dinna bialah ZPM Campaign Office hawnna neih a ni a. ZPM Working President Pu K. Sapdanga chuan thu sawiin, Pu Vanlalhlana, MLA Aizawl North-I chuan Campaign Office hi a hawng a ni.
Pu K. Sapdanga, chuan, “Nakkuma MLA election lo thleng tur hi a nghakhlel lo ber chu rorel lai party an ni a, a nghakhlel ber chu neutral-te an ni. Thalai ten rorelnaah kalphung thar an duh tawh a, kan ram kal tawh dan an thlirin an lung a awi tawh lo a ni,”a ti a. “ZPM hian kum li (4) hmel kan hmu chho ve dawn chauh a ni a. Kan mi huaisen, khawhar taka lo awm thin te kan fak tak zet che u a ni,” a ti bawk.
Pu Sapa chuan, “ZPM hian party dang kan haw lo, khawtlang leh Kohhrana kan rawngbawlpuite an ni. Amaherawhchu, engkim tan Pathian hun ruat a awm, tlak hun a awma, tlin hun a awm. Mipuite rilru suk thlek thlir hian rorelna hi ZPM party kutah an dah tawh hialin a hriat a ni,”a ti a. “Party dang zawng zawngin vawiina an beih rawn leh an huphurh rawn chu ZPM a ni a, an beih rawn luih luih reng mai a ni. Kan unaute hian sorkar thar siam turin min nawr lut dawn ni berin kan ngai,” a ti bawk.
Pu Sapa chuan, ZPM Candidate te an dinna bialah lo vote theuh turin a sawm a. Vote kan thlak hian keimahni tan kan thlak a ni tih rilru a hrereng chunga vote lo thlak turin MADC mipuite a chah a ni.
Campaign Office hawngtu Pu Vanlalhlana, MLA chuan, “Engpawh tawk i la, result tha emaw result lawmawm loh te emaw nei mah ila, lawm takin kan pawm tur a ni,” a ti a. Pathianah innghat tlat turin candidate te leh mipui te a chah bawk a ni.
