Cenrtal YMA hruaitute chuan President Pu R. Lalngheta hovin ni 29.4.2022 (inrinni) khan Bairabi hmun a Zampuimanga Group YMA in an man Burma Kuhva rah ro dan lova tawlh ruk dahkhawmna hmun Kuhva Kudam an tlawh a. Central YMA hruaitute hi Zampuimanga Group YMA hruaite ten an lo dawngsawng a ni.
Zampuimanga Group YMA te chuan ni 23.2.2022 khan Bairabi North-a Bamboo Industry Kudam-ah Burma Kuhva rah ro dahkhawm thahnem tak a awm thu an dawng a, police te nen enfiah nghal a niin Kuhva rah ro hi thahnem tak a lo awm a ni. Zampuimanga group YMA hruaitute chuan a enkawltute hnenah chuan Bairabi a thlen theih na tura document hrang hrang permit an neih te pe turin an ngen a. Zampuimanga group YMA hruaitute hi an pek theih loh avangin ni 13.4.2022 khan Sub Deputy Commissioner, Bairabi Sub-Division ah First Information Report(FIR) an thehlut ta a ni.
Central YMA hruaitute leh Zampuimanga group YMA hruaitute hi Bairabi South Branch YMA office ah inkawmkhawm pahin sawihona hun hman a ni a. He hun hi Pu H. Vanlalhruaia group YMA Vice President in a kaihruaia, Zampuimanga group YMA secretary Pu PB. Lalnunmawia hnen atangin Burma Kuhva rah ro an man dan leh tun thlenga an la hren dan report ngaihthlak a ni.
Central YMA leh Zampuimanga group YMA hruaitute inkawmkhawmna huna thusawitu Central YMA President Pu R. Lalngheta chuan, “Zampuimanga group YMA in dan lova Kuhva rah ro tawlh ruk dahkhawm thahnem tak in lo man hi Central YMA thuchhuak bawhzuina a ni a lawmawm kan ti hle a ni. Burma atanga dan lova lo kal Kuhva rah ro tawlh luh leh Mizoram a awmsa lakchhuah chungchang ah Central YMA chu a dinna ngai ah a la ding reng a, Central YMA in a tih dan tur a relfel hma chu Burma Kuhva rah ro hi tuman a rukin emaw kan thiam dan anga lo tawlh lo turin kan in ngen nawn leh a ni. Burma atanga Kuhva rah ro tawlh chungchang hi Central YMA chuan a zirchiang tu tur study team a siam tawh a, Central YMA study team te hian Mizoram hmun hrang hrang a Kuhva rah ro dahkhawmna Kudam an tlawhkual tawh a, mi chi hrang hrang an kawm tawh bawk a ni. CYMA Study team te leh Office Bearer(OB) ten kan sawiho leh anga, Central Executive Committee(CEC) meeting ah sawiho a ni leh dawn a, Central Executive Committee(CEC) meeting thutlukna angin kalpui a ni dawn a ni.”a ti.
Bairabi South Branch YMA office-a inkawmkhawmna neih zawh hian Bairabi North-a Bamboo Industry Kudam-a Burma Kuhva rah ro dahkhawmna hmun chu Central YMA hruaitute leh zampuimanga group YMA hruaitute chuan an en ho a ni.
