Vawiin khan I &PR Auditorium-ah Land Revenue and Settlement Department changtu Minister, Pu B. Lalchhanzova chuan Mizo Academy of Letters (MAL) in kum 2024 chhunga lehkhabu tha bera an thlan ‘Book of the year 2024’ lawmman chu ‘Hun inher kara Zofate’ tih ziaktu Pu F. Vanlalrochana hnenah a hlan.
MAL dincham vawi 51-na lawmna inkhawm hi MAL President Prof. RL Thanmawia chuan a kaihruai a. He inkhawmah hian khual lian Pu B. Lalchhanzova chuan, ziak mite chu hnam rohlu an nih thu leh ram leh hnam tana thuziak tha tak tak hnutchhiah turin a fuih a. Lehkhabua ziak mai piah lamah ngaihthlak theih tur zawnga an thuziak te pawh pho chhuak turin ziak mite chu a chah a ni. MAL book of the year, 2024 lawmman dawngtu Pu. F. Vanlalrochana chu a lawmpui thu leh chhuanawm a tih thu sawiin, “Mizo Hnam chanchin kal tawh aṭanga chhuiin, Mizote thatna leh ropuina lam a thlir a, chumi hmang chuan hun lo kal zel tur a kawhhmuh bawk. Hetianga a eng lam zawng leh a tha lam zawnga ziak lehkhabu hi kan hnam hian a mamawh a, hetiang lam lehkhabu hi kan ziah tam deuh deuh a ṭul a ni,” a ti.
Khuallian hian MAL Diamond Jubilee (1964-2024) souvenir ‘Mizo Thu leh Hla Zin Kawng’ tih phek 467-a chhah chu a tlangzarh a. He inkhawma khual zahawm, Pu Lalmuanpuia Punte, Political Adviser to Chief Minister chuan MAL Life member thar mi 40 te hnenah certificate a hlan bawk.
MAL General Secretary, Dr. Zoramdinthara report aṭanga alan danin, MAL hi kum 1964-a din a ni a, MAL general Headquarters hnuaiah member 402 an awm mek a, joint headquarters pathum leh branch pakhat an awm mek bawk a ni.
Book of the year 2024 Committee Secretary, Pu H. Lalawmpuia chuan, kum 2024 chhungin Mizo ṭawnga lehkhabu ziak 215 an lakkhawm theih thu a sawi a. Heng lehkhabu aṭang hian a tha zual 20 an thlang a, chumi hnuah 10 thleng lehin, chuta tang chuan pathum an thlang chhuak leh a, pathum an thlan chhuah aṭang chuan Book of the year chu thlan a nih thu a sawi a. Heng lehkhabu thlanah hian Committee chu a rawttu chauh an ni a, thutlukna leh thutawp siamtu chu MAL Executive Council an nih thu a sawi bawk.
MAL hian kumtin, an pawl din cham, William Shakespeare-a birthday April ni 23-ah Book of the year lawmman hi an hlan ṭhin a. Kumin hi Book of the year 36 thlanna niin, mi 30 in an dawng tawh a. Mi panga – B. Lalthangliana, C. Laizawna, Lalhriata, C. Lalnunchanga leh Lalhruaitluanga Chawngte te chuan tum hnih an dawng tawh a ni. Hmeichhia panga – Lalsangzuali Sailo, H. Lalngurliani, Romuanpuii Zadeng, Zohmangaihi leh Ahmangaihi Khiangte ten BoY hi an dawng tawh bawk.
MAL hnuaiah hian joint headquarters pathum leh branch pakhat bakah affiliated club thahnem tak an awm a. Vawiin chawhnu hian ‘Duhlian Chungchang Zir Hona’ seminar an buatsaih a, Dr. R. Zothanliana, Associate Professor, Mizoram University paper ziah chu an zir ho a ni.
