Dated : Aizawl, 24.4.2025
Central YMA hnuai ruihhlo do pawl, Central Anti Drugs Squad (CADS) te chuan hun engemaw chen an lo veh tawh ruihhlo No. 4 (Heroin) Hawng 400 (Kg 4 leh Gram 821) chu tukin zing dar 03:00 vel khan lirthei pahnih leh a khalhtu mi pahnih nen Saitualah an man. He ruihhlo man hi Rs. 1,12,00,000/- (Cheng Nuaih za sawm pahnih) hu vel ni a ngaih a ni.
He Ruihhlo No.4 (Heroin) tam tham tak mai hi lirthei (Car) Registration No. MZ01/J-8898 (Grand i10) Thangsangpuia (@Puia), kum 28, s/o Kapchhunga, Zawra Veng, Farkawn khua tuna Ramhlun North a cheng mek ni a in sawiin a khalh hnen atangin Hawng 200 (Kg 2 leh gram 400) man a ni a. Lirthei (Car) Registration No. MZ01/H-6514 (i10) Malsawmdawnga(@sawma), kum 29, s/o Zanghrechina, Zawra Veng, Farkawn khua tuna Khawmawi, Myanmar a khawsa mek nia in sawi in a khalh atangin Hawng 200 bawk (Kg 2 leh Gram 421) man a ni bawk.
Lirthei khalhtu mi 2 man te hian an lirthei khalhte chu Lalhmingmawia (@Mawia) Ngur Khua, Champhai District ni a an hriat, Zokhawthar leh Khawmawi, Myanmar lamah te a khawsa kual vel thin ta niin an sawi a. Heng an ruihhlo phurh pawh hi ama ta vek niin an sawi bakah Lalhmingmawia (@Mawia) nen hian Vairengte daia hnamdang (Vai) hnenah Rs. 80,000/- ve ve hlawha, zu hlan tura in be fel an nih thu an sawi bawk. Lirthei khalhtu te in puan zelnaah tun tum hi an vawi 3 kalna chiah niin a vawi 1-naah Hawng 100 ve ve phurin, a vawin 2-naah Hawng 200 ve ve an phur leh a, tunah pawh hian Hawng 200 ve ve an phur leh niin an sawi.
CADS hruaitute chuan Lalhmingmawia hian ruihhlo nasa takin a tawlh tih hriain theih tawpin an chhui reng a, ruihhlo tlawh nana a lirthei hman thin Regn. No. te an hriat hnuah an man thei ta a ni. Ruihhlo Hawng 400 leh a phurhna lirthei pahnih leh a khalhtute an man rual hian a neitu tak Lalhmingmawia erawh chu Myanmar lamah a lo tlan chhiat hman avangin man a la ni ve rih lo a ni.
Central YMA CADS te hian ruihhlo phur lirtheite hi Zokhawthar atanga a lo chhuah atanga a thlen chin hre zelin nizan zantir atang khan Saitualah a tawp tih an hria a. Central YMA President hovin CEC leh CADS member thenkhatten Aizawl lam atanga han kal chilhin Keifang leh Saitual chhehvel dapa an beidawn thelh hnuah Sub Headquarter YMA, Saitual hruaitute puihna in, an lo riahna Manase Home Stay, Tamdil Road, PWD veng, Saitualah an han nang ching a, thuneitute thu rawn angin rang taka Aizawl rawn thlenpui an nih hnuah Excise & Narcotics Deptt. thuneituten an ruihhlo thuhrukna atanga hai chhuakin thubuai an siam sak zui ta a ni.
He ruihhlo man hian Aizawl thlenpui a nih ve leh Home Minister, Pu Sapdanga leh END Minister, Pu Lalnghinglova Hmar ten Central YMA Office panin a hmunah an lo dawngsawng a ni
