Vawiin ni 25.04.2025 (Zirtawpni) chawhma dar 11 hian MNF Party chuan an office Mizo Hnam Run-ah chhung inkhawm an nei a. Political session-a thusawitu Er. R. Rohmingliana, MLA, MNF Legislature Party Secretary ni bawk chuan, “ZPM sorkar hotuten ruihhlo leh dan lova sumdawnna manchhuah naah inlan duhna leh inlan duhlohna an nei. An thiltih leh tihloh aimahin, an insawi anga an awmleh awmloh kan bengkhawn a, an intiam leh an insawi anga an awmlo hi kan sawisel mai zawk a ni. Chhiah kan tisang lovang an ti a, rem leh remlovin kawng hrang hrangah chhiah an tisang leh si a. Thlaithar lei chungchangah pawh an intiam angin an lei lova. Budget-a thlaithar lehna tur an dah ve pawh MNF sorkar sum hnutchhiat atanga tlem azawng chauh a ni a, awmze neiin an la hmangzo thei lova, D-Â-H dah an sawi chu a la hla hle a ni. Chief Minister in kuthnathawktute thlaithar lei zawhsak vek theih a beisei loh thu a sawite kha a lungchhiatthlak hle a ni,” a ti.
Er. Rohminga, MLA chuan, “Ruihhlo tamtham tak man a ni a, rampuma kan sawi luai luai laiin kan sorkar hotute thawm hriattur a awm lova. Tunhnai lawkah ruihhlo tamtham tak man a ni leh a, kan sorkar hotute an lo lang leh thuai lawi si a. Chutiang bawkin kuhva ro dan lova tawlh man anih chungchangah pawh, dan anga man hi dan lovin tihral an tum em ni? Restricted option hmanga an duhsak zawngte vulhnan hman an tum ni a lang hi a fello takzet a ni. ZPM sorkar hian ruihhlo leh dan lova sumdawnna tunhnaia manchhuah anih naah hian, a thenah an lang a, thenkhatah an thawm hriattur a awm leh silo hi a mak hle. LADC sorkarna inthlakthleng chungchanga ZPM MDC te leh party worker te chetdan chu dankalh leh tharum thawhna ni a lang a ni a. Police hnena thlen anih hnuah pawh hmalakna mumal a awm lova. Chuvangin, ZPM sorkar hian kan police chhuanawm tak takte kut hi a phuarsak em ni?” a ti.
Er. R. Rohmingliana, MLA , Secretary, MNF Legislature Party chuan, UC diklo ngaimawh thinte khan tender chhuah hmain UC lem an thehlut hrehlo a. Assembly session ah zawhna tamtak ka zawt a, min nuihzat a. Amaherawhchu, danin min phalsak anga zawhna siam ka ni a. Zawhna chhan anih danah zawhna a tam hle a ni.
MNF GS chuan, ZPM sorkar ziarang kan hrechiang thawkhat ta bawk a, sorkar tir zel tlak an nih lohzia a langchho zel a. Tlakranna leh tlakchhiatna nasa zawk kan rama a thlen lohnan, ram leh hnam tana ding, Pathian leh kan ram tan titu MNF hian sorkarna a chan leh thuai theihnan theihtawp chhuah zel turin party mipui kalkhawmte a fuih a; mipui a ngen nghal bawk.
