MNF Action & Vigilance Committee chuan vawiin (April ni 29, 2025) khan thuchhuah siamin, “Mizoram sorkar inrelbawlna hi mumal taka duan sa a ni a. Sum thawkchhuak tura siamte, mipui rawngbawl tura siam leh mipui venghimtu tura siam leh adangte a awm a, sum hmuhlet beisei miah loa mipui rawngbawlna tur liau liau Education Deptt. te, Health & Family Dept te, Social Welfare leh Food Civil Supply & Consumers Affairs Dept leh a dangte a awm a. Heng zingapawimawh ber, chhungtin leh mitin rawngbawl tura siam Food Civil Supplies & Consumers Affairs Department kaltlangin tun Sorkar, ZPM kaihhruai hian nasa takin mipui a rawk hi hriatthiam harsa kan ti hle a, an thiltihte ennawna siam tha turin kan phut a ni,” an ti.
MNF Action & Vigilance Committee chuan, an thuchhuahah chuan hetiang hian an tarlang bawk.
(1) Buhfai man tih to: August 2024 atang khan tuilet hnu-a Mizo mipuite tawrhna lian ber nia ngaih turin chhungtin khawih buhfai man uchuak takin anti to a, sorkar kal tawh aia ZPM kaihhruai sorkarin ration buhfai atang ringawta Mizo mipui chhungtinten an buhfai khul to-na tur ringawt hi kum khat chhungin cheng Vaibelchhetak 6, nuaih zathum chuang ni tura chhut a ni.
“Hetiang taka Mizo mipui chhungtin tawrhna thlen tirna ang thutlukna hi sorkar kal tawhte khan an la siam ngai lo.
(2) RTI Act hmanga information kan hmuh danin March 2025 thleng khan Mizoramah ration card hi 290868 a awm mek a. Ration card khulna tur hi Rs. 20/- ni tura bituk a nih laiin khaw hrang hrangah an duh ang zat zatin min khul tir hi pawi kan ti hle a. Champhai District bika information kan dawn danin ration card khulna hi a let aia to Rs. 50 te Rs.30 leh adangte-a khul tir kan ni a, sorkar rate bituk aia a leta tama ration card min khultir hi Eirukna lian tak a ni a, chhun en laia inrawkna leh eiruk an tih ang, khaw eng zahna nei miah loa rawk kan tawk hi hriatthiam har kan ti hle.
“Uchuak taka ration man an tihto tawh bakah ration card man leh zel an bithliah aia to uchuak taka min khul tir leh hi na kan ti a, hetiang em em sum duh sorkar kan nei hi Mizo ang pawhin vanduaithlak kan ti a, ration card khulna tur an rate bituk hi mipui bumna mai mai nge? a aia to daiha min khul tirna hi enga tan nge sorkarin hman a tum? tih kan zawt a. Hetianga rate bituk aia to a ration card min khul tir tawh zawng zawng hi min pe let leh vek turin Sorkar kan phut a, thla khat chhunga min pe let lo a nih chuan MNF chuan mipui thlavang hauh hian hma kan la dawn tih kan puang nghal a ni.
(3) ZPM kaihhruai sorkar hian mi dang chhe thei ang bera sawiselin, ration buk dik tak pek min tiam a, chutiang tur chuan sorkar hmasa hun laia retailer ruatte / thlante hnen atangin an ration lak apiangin Buhfai bag rihna pawh it-in an chhuhsak zel kha a ni a, tunah anmahni party mi leh sa, an duh zawngte an ruat/ an thlan hnu hian Buhfai bag, sorkar hmasa thlan ratailer te hnen atanga an chhuhsak kha an chhuh ve leh si lo hi rorelna dik lo tak leh Kristiante tih atana mawi lo tak niin MNF chuan kan ngai.
“Khatianga, sorkar hmasa hun laia retailer thlan/ruatte hnen atanga buhfai bag rihna leh zel laksak chunga buhfai buk tling leh dik tak a pe tur leh zing dar ruk atanga sem tan turte, nitin buhfai sem turte-a an phut ang khan tuna anmahni party miten retailer hna an thawh hnu pawh hian phut ve zel turin sorkar hi kan phut a ni.
“Tunah hian buk tling lo takin ration buhfai hi Mizo mipuiten kan khul mek a, min tiam ang ngeiin Buhfai buk dik tak min pe turin kan phut a..
“ZPM hian tha bik tur leh dik bik tura min tiam avanga Mizo mipuiin thlang tling kan ni a, an sawi loh ang leh mipui tawrhna tur ang zela an kal ta hi MNF chuan pawi kan ti a, hetiang bum hmang, sum ngaina tak, thil tha tak tak sawia chhe tak taka rorel ching an nihna hi sim vat tur leh mipui min tiam ang ngeia tha taka rorel turin kan phut a ni,” an ti bawk.
