ZPM Lai District Headquarters chuan thuchhuah siamin, “11th Lai Autonomous District Council kal mekah, ZPM kaihhruai sawrkar tluang tak leh tha taka kal chho tura ram mipuite’n beiseina sang tak an neih mek laiin, MDC pahnih M. Kawnpui bialtu N. Zangura leh Sangau East bialtu BN. Thangpuia ten ZPM party chhuahsana BJP an zawm tak avanga LADC sawrkar a nghing leh ta hi ZPM Lai District Headquarters chuan pawi a ti hle a! Dan ang taka CEM nilai Pu V. Zirsanga’n a dawhkan a luah mek laia Mizoram Governor zahawm takin CEM dang ruatna lehkha a ti chhuak hi mak kan tiin, dan pawi sak lohna lian takah kan ngai a, mi thenkhatte’n Governor hi CCB Rules an bawhchhiat tir ni ngeiin a lang a ni,” an ti.
ZPM Lai District Headquarters, “LADC CCB Rules 2010, bung 5-na, chang 23(1) b te, chang 24 (1) te kan en chuan CEM nilai paih thlak theih dan chu ; amah CEM in banna ziaka a thehluh in emaw, sawrkar kal lai rintawklohna (No Confidence Motion) hmangin emaw, CEM hi paihthlak theih a ni a. Tin, chang 21 (5) hmangin Governor hian t ul a tih chuan CEM appoint a nih at anga ni 30 chhungin CEM hian member a ngah tawk em tih hi, Vote of Confidence a lak tir thei a ni. CEM ni mek Pu V. Zirsanga hian member a ngah tawk em tih fiahna hmachhawn turin Chairman Pu VL. Hmuaka chuan ni 18th March, 2025 khan Session a ko a. Mahse, Pu V.Zirsanga CEM hian majority a command a, fiahna hi a paltlang ngei dawn tih a lan takah chuan, Chairman Pu VL. Hmuaka leh Deputy Chairman Pu H. Lalmuansanga te chuan game tenawm tak khelin an nihna atangin an bang a, Vote of Confidence hi neih theih a nita lo a ni.
“Session neih theih a nih loh thu hi Pu V. Zirsanga CEM chuan DC & MA Secretary hnenah a hriattir nghal a. Chairman thlanna neihtir turin Protem Chairman atan C. Biakthansangi MDC chu appoint turin a dil a, hei hi pawmsak niin Protem Chairman appointment chu ni 24 March, 2025 khan a rawn chhuak a, ni 26 March, 2025 ah Chairman thlanna nei turin DC & MA at angin lehkha a rawn chhuak nghal bawk a ni. Ni 26 March, 2025 khan Protem Chairman C. Biakthansangi kaihhruainain Chairman thlanna neih a ni a, Opposition lamin nomination an file ngam ta k lohah chuan Vawmbuk bialtu MDC Pu T. Zakunga ZPM chu Chairman atan Uncontest in a tling ta a ni. Pu T. Zakunga Chairman a nih hnu hi chuan, Governor in vote of Confidence nei tura lehkha a tihchhuah chuan ni 30 a pelh tawh vangin, a elapse hman ta a ni. Hetia floor test neih theih a nih lohna chhan ber hi Chairman Pu VL. Hmuaka leh Deputy Chairman Pu H. Lalmuansanga ten politics game tenawm tak an khel a, banna an thehluh vang kha a ni a, hemi chungchangah hian mawhphurtu lian ber te an ni.
“Kan ramin a mamawh tawh e m avangin Chairman Pu T. Zakunga chuan ni 17th – 22nd April, 2025 chhunga neih turin Emergency Budget Session a ko a, Session ah hian Deputy Chairman thlanna neih a ni a, Budget pawh tluang takin pass a nih hnuin ni 22nd April, 2025 tlai lam dar 02:40 p.m khan session hi tiam chin awm lova tih tawp a ni.
“Session neih zawh a nih hnu, ni 22nd April 2025 tlai lam dar 4:30 ah Governor lehkha DC&MA kaltlangin Vote of Confidence nei tura hriattirna lehkha Chairman LADC chuan dawng hnuhnawh lehin, vote of confidence neih a nih hma chu budget leh appointment engmah kalpui theih a nih loh thu hmuh a ni a.
“Heihi Leader of Opposition Pu C. Lalsawmzuala’n Governor order hmu reng chungin Chairman in Session a kaltlangpui anga a sawi kha, a hriatfuh tawk loh vang tih a chiang hle a ni.
“Hetia budget pass fel tawh pawmlo tura lehkha a rawn chhuahna chhan hi BJP ten ram mipuite leh district council a thawktute ngaihtuah miah lovin, lalna leh thuneihna an duh luat avanga Governor hnena nasa taka an nawr avanga thilthleng a ni tih a lang chiang hle. Hetia Vote of Confidence neih chungchang lehkha a rawn chhuah thar leh takah chuan M. Kawnpui bialtu Pu N. Zangura ZPM MDC chu BJP hruaituten CEM nihna tawktarhin, Aizawl lamah tlan puiin, BJP a zawm nghal a. MNF MDC te nen in mawngzawmin Sorkarna siamthei turin stake claim an nei ta a ni. CEM nilai Pu V. Zirsanga’n CEM dawhkan a luah reng lai a, stake claim an nei ringawt pawh hi, thil diklo hulhual a ni.
“Dan hmanga CEM nilai Pu V. Zirsanga paih thlakna awm silo leh, amah pawhin banna a thehluh hma hauhva Governor at anga BJP MDC Pu N. Zangura CEM atana ruatna lehkha an rawn tichhuak ta mai hi, lalna dawhkan ringawt buaipuitu ten kan Governor zahawm tak hi an hruaisual (misguide) ta mai niin a lang. LADC zahawmna min vawnhim saktu tur ber kan Governor hetiang a misguide a ni ta mai hi pawi kan tiin, ZPM Lai District Headquarters chuan he thil diklo hi kan dem takzet a ni. Sawrkar ngialnghet a awm theihnan a Lairam a Zirlai pawl lian ber hmalakna hi ZPM Lai District Headquarters chuan a thlawp tlat bawk a ni.
“Kan ramah hian lalna leh thuneihna duh a vanga, a ram mipuite hmaizahna nei miah lova, lalna duh avanga Sorkarna inchuh buai renga a awm hi tha kan ti tawh lova. LADC ah sorkar ngialnghet tak a din theihna turin, tun sorkar kal mek hi thiat a, a hma lama inthlanna neih hi ZPM Lai District Headquaters duhdan a ni,” tiin thuchhuah an siamah an tarlang bawk.
