Aizawl May 3 : Tukin Dar 8 khan Deputy Commissioner, Aizawl leh Central YMA tangkawp buatsaihin, India Independence Day Vawi 75-na pualin hmankhat daih sarang chungchang inzirtirna hun Vanapa Hall kawtah hman a ni. He hun hi AMC Deputy Mayor leh Ward XII Councillor ni bawk Pu R.Thanglura’n a hmanpui a ni.
He hunah hian Branch 14- Tuikual South Branch YMA, Tuikual North Branch YMA, Dawrpui Branch YMA, Venghlui Branch YMA, Saron Veng Branch YMA, Dawrpui Vengthar Branch YMA, Dinthar Branch YMA, Khatla Branch YMA, Khatla South Branch YMA, New Capital Branch YMA, Tuikhuahtlang Branch YMA, Chhinga Veng Branch YMA, Electric Veng Branch YMA, Zarkawt Branch YMA atangin mi 20 theuhin Vanapa Hall kawt panin an in tawk khawm a. Branch aiawh rawn kal te hian hmankhat daih sarang chungchang inzirtirna thuziak tawi (placard) thawhchhuahpuiin hmankhat daih sarang hmanglo tura intiamna leh midangte zirtir tura intiamna thuchham a ni a.
Dr. Lalhriatzuali Ralte, Deputy Commissioner, Aizawl chuan ram leilung leh hnam humhalh kawngah mitinin mawhphurhna kan nei a, kan ram leilung ti chhe thei (degrade), hmankhat daih sarang do kawngah sawrkar leh CYMA ten hma an lakna hi hlawhtling tur chuan bul tan phawt a ngai a, vawiin program tawite hi bul tan nan hmang ila, tiin mipuite a sawm a. Mihring hriselnan boruak thianghlim leh kan chheh vel environment tha kan mamawh tih hria in, rilru leh taksa hrisel chu ram hmasawnnan a pawimawh tak zet zet a ni, a ti a. Hemi kawngah hian mitinin faina ngaina a, inthlahdah leh dawngdah nun nei lo a, khawtlang leh ram tana tan la zel turin a fuih a ni. Faina chungchangah tawihtheilo plastic/sarang then fai hnatlang vengtina neiturin Branch YMA te a ngen a, sawkar pisa thenkhat Directorate of Rural Development, Environment, Forest and Climate Change Department te chu plastic free office ah puan a nih thu sawiin, pisa dang te pawh puan a nih zel a beisei thu a sawi a ni.
Pu Lalduhawma, Member Secretary, State Pollution Control Board pawhin thu sawiin sarang 120 micron aia pan hman phal a nih tawhloh thu sawiin, a awlsam zawng chuan sarang hrim hrim pan tak anga kan ngaih pawh dan in hman a phal tawhlo a ni, a ti a. Sarang thlakna tur atan puan (cotton) hmang uar ila, a thlakna tur ngaihtuah kawngah rilru seng thiam entrepreneur tam tak kan nei a, mipuiten zawhna kan zawhfo sarang thlakna tur chu sarang kan hman tawp hun hunah a lo piang mai ang tiin a sawi a ni. Sawrkar in dan a siam zawm hi thil finthlak tak a ni a, khua leh tui tha nihna a ni, a ti bawk a ni.
