Vawiin 15th May, 2025 hian Mizoram Pradesh Congress Committee (MPCC) President Lal Thanzara chuan Lungpho (Serchhip District, Tuikum A/C) khua a tlawh a, amah lo lawmtu Congress party worker leh Kut hnathawktu thenkhatte hmaah thu sawiin, Kut hnathawktu sawhthing chingtuten an thawhrah an seng thei lo chu a lainat thu a sawi.
Lal Thanzara chuan, “Kan enchhin sawrkar hnuaiah hian sum leng vak a tlem em em a, Aizawl khawpuia sumdawng ten pawisa a van thu an sawi nasa hle a ni. ZPM sawrkar hotute zingah Delhi tlanga sum purchaw tura kal ngam an awm mang lo chu a vanduaithlak hle a. MLA inthlan hnuhnung bera BJP ten ZPM candidate te sum leh paia an puih avangin he sawrkarah hian phut let an nei lian niin a hriat a. BJP MLA pahnihte hi Minister-a dah turin thu pawh an rawn niin sawi a awm a, chutiang anih loh chuan sum leh paia puitute ngei hian ZPM sawrkar hi an hrek mek niin kan hria a, chuvangin he sawrkarah hian mipuite tan beisei san tur a awm lo a ni,” a ti.
MPCC President chuan, Mizoram khaw hrang hrang a fankualnaah mipuiten Congress sawrkar leh hun an nghahhlelh thu an sawi nasa a, Mizoram hmun hrang hrangah MLA 1 chauh nei Congress party zawm thar an awm zel chu a lawmawm hle a ni, a ti.
“BJP sawrkarna state ah Kristian te an chep nasa tawh hle, tunhnai maiah pawh Assam state chhunga hmun pakhatah chuan kan sakhaw hruaituten rawngbawlna pawimawh an neihah banner pawh an tar ngam lo a ni. Hetiang khawpa Kristian ten kan tawrh tawh laia MNF leh ZPM ten BJP an thawhpui tlat ngaimawh nachang kan hre lo hi a mak em em a, ringtute hi kan harh a hun ta hle a ni,” a ti bawk.
MPCC President hi Lungpho khuaa party hruaitute leh kut hnathawktu thenkhat ten an lo dawngsawng a, Sawhthing chingtuten an harsatnate an lo thlen a ni. Lungpho khuaa Badminton Club hruaitu pakhat chuan sawhthing dahkhawl avangin Badminton an khelh theihlohna a rei tawh thu a sawi. MPCC President hi MPCC hruaitu engemaw zatin an tawiawm a ni.
