Vawiin 16th May, 2025 hian BJP Mizoram chuan Friday Political Session leh 300th Birth Anniversary of Ahilyabai Holkar chungchangah State Level Workshop hman niin, Pu K. Changliana, State Vice President-in inkhawm a kaihruaia, Pu Vanlalhmuaka, State President-in thusawina hun a nei bawk.
Pu Vanlalhmuaka, State President chuan, “Vawiina State Level Workshop kan hman chhan chu, nu ropui tak Ahilyabai Holkar hi Indian hmeichhiate zinga hmeichhe ropui ber pawla mi a nih avangin BJP chuan ropui takin a kum 300-na lawm kan tum vang a ni a. Mi ropui tak ni mahse, India hian kan chawimawi tawk lova, kan hmelhriat lutuk lo bawk a ni, nimahsela tun hunah chuan ama puala hun kan han hmang thei hi a lawmawm hle a ni,” a ti.
Pu Vanlalhmuaka chuan sawi chhunzawmin, “Ahilyabai Holkar hnathawh leh hmalakna te chu a ropui hle a, mi rethei tan te leh hmeichhiate hamṭhatna tura a hmalakna te, khawtlang tana a hnathawh ṭha tak takte chu PM Pu Modi-a chuan chhawm nungin, hmeichhiate tan Schemes ṭha tak tak a duanga, vawiina PM Schemes kan neih te hi Ahilyabai Holkar hmalakna rah chhuah tam tak a awm a ni, Entrepreneurship tih hmasawn nana schemes duan tam takte hi Pi Ahilyabai hnathawh zulzuia ruahman te a ni hlawm a ni, tin lalnu ropui tak a ni a, a lalram tan hna a thawk ropui hle a, rorel a thiamna te, a huaisenna te, ram a kaihhruai thiamna te hian hmeichhiate duai loh zia leh ram kaihruaitu ṭha an nih theih zia a lantir a ni,” a ti bawk.
