Vawiin khan Mizo Hnam Runah chhung inkhawm neih a ni a, Wing Commander J Lalhmingliana, MNF Adviser chuan thu a sawi a. “Tun sorkarah hian Civil Aviation lamah ṭhan i beisei lovang u, a ngaihna thlawt an hre lo,” a ti.
Pu J Hminga chuan, “Lengpui Airport bul ṭantu tak tak chu Pu Laldenga, Mizoram Chief Minister hlui, MNF founder President kha a ni. MNF sorkar lei 1987-a survey team a din aṭanga lo inṭan a ni a, kei pawh team leader-ah min dah ve nghe nghe a. Hemi ṭum hian thla 6 chhunga report pe tur kan ni a, Lunglei Kawmzawl te pawh kan en nghal nghe nghe a ni,” a ti a. “Pu Laldenga khan Rajiv Gandhi hnenah Mizoram-in Airport thar kan neih theih nan nasa takin a sawi a. DO letter te pawh a ziak a, hmuh ṭul ang ang Minister dangte pawh a dawr bawk a ni. Chumi kal zelah chuan 1991 khan Mizoram Airport survey tur tak takte an lokal kal ta a ni,” a ti.
Wing Commander J Hminga chuan, “Lengpui Airport hi 1995-ah sak ṭan theihin sum a awm ta a, 1996-ah sak ṭan niin 12.12.1998-ah MNF sorkar-na hnuaiah hawn a lo ni ta a ni. A bul ṭantu MNF hunlai bawkin Lengpui Airport hi hawn a lo ni ta a ni,” a ti.
Pu J Hminga chuan, “Air Force-a kum 23 ka lo thawh tawh a ka tawnhriat aṭangin Lengpui Airport Indian Air Force kuta hlan tum hi thil tih chi a ni lo, tih hi ka ngaihdan a ni. Airport hi inṭawm chi a ni lo. Air Force leh Civil flying a inpawlhna reng rengah Civil an insawn chhuak zel a ni. IAF kuta kan Airport kan hlan chuan kumkhuaa kan inchhirna tur a ni ang,” a ti a. “Ralthuam famkim nena inthuam, hman phalna nei bawk si nena thil inṭawm chu tih chi a ni lo. A zir chiangtute hian an zirchiang lo a ni,” a ti bawk.
He inkhawm hi Lalhmangaiha Renthlei, MNF Secretary-in a kaihruai a ni.
