Aizawl May 4 : Mizoram Legislative Assembly Golden Jubilee (1972-2022) lawmna kal zelah vawiin khan Deputy Speaker Er. Lalrinawma chuan Assembly Annexe building-ah District Council hunlai atanga vawiin thlenga Assembly kaihhnawih thlalak hlui leh thildang chi hrang hrang phochhuahna ‘Golden Jubilee Exhibition’ a hawng. May ni 4-10, 2022 chhunga neih tur he Exhibition hi vawiin atanga May ni 6 (Zirtawpni) thleng khian zirna in (institutions) leh mipui (public) a tlawh duh apiangte tan hawn a ni ang.
Mizoram Legislative Assembly chuan May ni 10, 2022 khian a kum 50-na ‘Golden Jubilee’ a lo thleng dawn ta a. Speaker Pu Lalrinliana Sailo kaihhruaina hnuaiah a lawmna pui ber chu May ni 10-ah neih a ni ang a, hemi ni hian Golden Jubilee pualin Assembly Special Session neih a ni ang. Golden Jubilee lawmnaah hian Lok Sabha Speaker Pu O. M. Birla chu khuallian a ni ang a, Session-ah thu a sawi ang. Golden Jubilee programme hrang hrang siamte hman chho mek a ni a, Golden Jubilee lungphun tur pawh peih tawh a ni.
Kum 1952-ah Assam state hnuaiah Lushai Hills District a lo piang a, a hnuah Mizo District Council tiin a hming thlak a ni a. Union Territory a nih thlengin District Council term 4 a awm hman a. Kum 1972-ah Mizoram chu Union Territory-ah hlan kai a ni a, Assembly Session hmasa ber chu May 10, 1972 ah neih a ni. MLA thlan 30 leh nominated 3 awmin an vaiin member 33 an ni. UT nih chhung hian inthlanpui tum 4 neih hman a ni a. Kum 1987 February 20 atangin Mizoram chu State puitling a lo ni ta a, member pawh 40 thlan a lo ni chho ta a, nominated seat a awm ta lo bawk. State puilting nih hnuah inthlanpui tum 8 a awm tawh a ni.
Mizoram Legislative Assembly chuan May 10 khian kum 50-a upa a lo ni dawn ta a. A tir atanga chhiarin MLA 232 an awm tawh a, chung zinga mi 92 chuan chatuan ram min lo pansan tawh a ni. Kum 50 chhung hian Assembly Session vawi 138 neih ni tawhin, sitting neih zat 955 a ni. Government Bill 488 lut tawhin 477 passed a ni a, Private Members Bill 5 lut tawhin a vaiin pass loh a ni. Assembly Committee hrang hrang ten a vaiin House-ah Reports 500 chuang an present tawh bawk a ni.
