Vawiin 23-05-2025, Zirtawpni hian Congress Bhavan, Aizawlah Mizoram Pradesh Congress Committee chuan Friday Political Session neiin, MPCC President Pu Lal Thanzara’n chuan Congress party ah mithar lawmlutin thu a sawi bawk.
Pu Lal Thanzara chuan, “Kan sorkar hrawn mek kawng zawh lai kan sawi lo thei lo va, an insawi anga an awm loh em avangin an chanchin kan sawi lo thei lo va. Sorkar hi mipuite tana muanawm a ni tur a ni a, sumdawng leh kuthnathawkte tana chhenfakawm an ni tur a ni. Vawiina sorkar hi sorkar kal tate ang lo taka tha bik ni tura inzuar an ni a, kan Chief Minister hian, ‘Kan danglam bik loh chuan CM ka ni peih lo’ a ti hial a; mahse, an danglam bikna hmuh tur a awm lo a ni.
“An thupui ber chu kawt kaiah sawhthing Rs. 50/- a lei sak an tiam a, he sorkarah hian kuthnathawktute kan rum mek zawk a ni.
“”ZPM sorkarin buhfai man a lêt thawka an tihpun a vang hian sorkarin kum khatah cheng vbch 89.61 a neih belh a. Buhfai man tihto hi sorkar sum tuakna pakhat a ni.’ Tuialhthei man tihsan atangin vbch 26.50 an hmu a. He cess an lak chhan hi kawng siam nan an ti a, kawng a that loh zia kan hria. Mipuite tan thil man a san phah hle zawk a ni. sum kan puk ve lovang titute hian kum khat chhungin Vbch 3133.45 an puk a, mipui tan phurrit an siam a ni. An sorkar hnua sorkar tan a huphurhawm hle. Congress sorkar tan tirh kum 2008-ah khan MNF leiba hnutchhiah kha GSDP atanga teha 103% lai a ni a. Kum 10 kan sorkar hnu kum 2018 ah chuan GSDP atanga teha 32% ah leiba a tla thla a ni.
“Tuna sorkar mek hi Financial Management lamah an hlawhchham chiang hle a, hei vang hian mipui sum lengvak a harsat phah a. Chhiah hrang² an lak avang hian mipui tan khawsak harsatna a thlen a. He sum harsatna avang hian rukruk a hluar phah a, sum duh avanga ruihtheih thil tawlh a hluar em em a, ruihhlo ti mi pawh an pung chho hle a. Vawiinah chuan kuhva lei ang maia awlsamin drug a hluar a, hausa thar thutte an pung zel a, thalai boral an tam phah hle a, kohhran pawh a mangan phah hle a ni.
“Kan hun tawn hi a vanduaithlak hle a, hmunphiah leh sawhthing chingtute mai ni lovin mipui zawng zawng hian kan tuar mek a. A chhan kan zawn chhuah a ngai ta hle. A chhan bulpui ber nia lang chu Chanchintha hrilh dodaltu BJP sorkar hi kan sorkar hian a zawm tlat si chuan, lei malsawmna kan dawn a rinawm loh.
“India ram lairilah kan missionary ten ualau takin rawng an bawl ngam tawh lova, social worker angin rawng an bawl mek a. Saiip puan sina Sual Thupha chawia tawngtaina sorkar kan nei a, a thlamuan thlak viau laiin sakhaw zalenna rahbeh duh tute kan thurualpui chhung chuan malsawmna kan dawn a beisei awm loh hle.
“ZPM Thalai ten, ‘BJP nena inzawm angin dawt a vawrh darh’ tiin min sawi a, a finfiahna an phut a. He thil hi ka finfiah thiam dan chu, ‘BJP sorkar hian eng vangin nge, ZPM sorkarah hian a inlulin em em a, eng vangin nge BJP MLA te hi chanvo pawimawh pe tura a ngen ngam, tih hi ka chhanna a ni.’
“ZPM ten Congress party in thlai thar kan lei tawh reng em tih min zawt a, Congress sorkar lai khan sawhthing chingtute mangang khan khatih laia kan CM kha an bel a. CM chuan, ‘Ching rawh u’ kan ti a ni lo ti chungin a lei sak vek a, a hralh chhawnna mai tur a awm mai loh avangin a tawih hial a ni. Cheng 50-a lei tiamtute nen hian kan inang lo hle.
“MNF president hian, ‘Phai lamah pawh Congress an ral mek’ a ti a. Tunah hian MLA 10 la nei mah se, Zoram mipuite hian an lam an hawi lem lo niin a lang a. Cheng nuai 3 sem tumin nuai 1 pawh an sem phak lo va, NEDA ah BJP te nen an inzawmna an la chhuchat ngam lo niin kan hria. Hei vang bawk hian an sorkar lai khan malsawmna kan dawng lo va, kha tih laia CM leh Kamrula te erawhin malsawnna an dawng thung a ni.
“Ram leh hnam hruai hi Mahni sahmim tih puarna leh lal hrawtna mai mai a ni lo va, mipuite hian inthlan hmaa an auhla ti hlawhtling turin eng nge an thawh? Mipuite hnena an intiamna an tih hlawhtlin dan hi ngun taka ngaituah turin Zoram mipuite ka ngen a ni.” tiin a sawi.
