Vawiin khan Mizoram Pradesh Youth Congress Committee (MPYCC) leh Lunglei District Youth Congress Committee (LDYCC) buatsaihin intuaitharna hun MPYCC Office, Congress Bhawan, Aizawlah hman a ni a. He hun hi Ngurdingpuia Pachuau, Senior Vice President MPYCC chuan a hmanpui a ni.
Ngurdingpuia Pachuau, Sr. Vice President, MPYCC chuan Congress Party chuan, nitin sorkarna chelh turin hma a sawn zel tih sawiin hruaitu rintlak, Pathian tih mi leh midang huikhawm kawnga hruaitu rilru fim Pu Lal Thanzara kan nei a, a hruaina hnuaiah Congress Party chu zahawm leh boruak duhawm tak neiin a kal mek a. Thalaite leh mipui rinna pawh thil a nihna dik tak chauh sawi thin Pu Lal Thanzara kaihhruai Congress party ah a awm a ni, a ti.
Ngurdingpuia Pachuau chuan, May ni 24, 2025 khan New Delhi-ah CM Pu Lalduhoma chu NITI Aayog Governing Council vawi 10-naa Prime Minister Narendra Modi kaihhruaiah telin, Prime Minister hi hmaichhanah be phak ve lo mahse hemi tum hian Aizawl khawpuiah Mizoram mipui zawng zawng zaa 80 chu an cheng niin PTI in a tarlan chu heng national media India Today NE, NE News leh The Print ten nasa takin an tarlang tih a sawi a. Chhiarpui hnuhnung ber kum 2011 census-ah Aizawla mipui cheng zat hi Mizoram mipui zawng zawng a\anga teh pawhin 27% chauh an ni tih sawiin, Chief Minister hian state hrang hrang ‘data’ kimchang neitu, Planning Commission thlaktu leh state tinte dinhmun chiang taka hretu NITI Aayog hmaah thudik tawk lo hmangin boruak siam tum luatah dawt a zu sawi ta mai em ni? May ni 29.2025 (Ningani) Vanglaini chhuak meuh pawhin Chief Minister in NITI Aayog Governing Council vawi 10-naa khawpui thar mi nuai 10-15 vel chen theihna tur Thenzawla khawpui lian din a sawi chu thil harsa tak, a taka hlawhtling thei ngai lo tur, mumang ram an tih ang chi niin editorial-ah an ziak hial a ni, tih sawiin, ZPM Chief Minister Pu Lalduhoma leh MNF hotupa hian rilru Doctor pan ve ve an ngai a ni, a ti.
Ngurdingpuia Pachuau chuan kum 2018 a Smart City chhinchhiah danah Aizawl Urban Area (AUA) a mihring cheng zat chu Aizawl khawpui leh a chhehvel khua chhiar tel a ni chung pawhin 3,10,891 chauh a ni a. Aizawlah kum 2023 khan mi 12,50,000 awm anga chhût niin kumin 2025-ah mi 4,27,000 vel awm anga chhût a ni bawk. Heti chung pawha Chief Minister in Aizawl khawpuia mihring cheng zat 80% nia a sawi hi thil dik lo lian tak a ni. Hetiang thubelhchian dawl lo a sawi chhan hi MLA atanga ban anih kuma Serchhip bial MLA By-election neih tuma Thenzawl, Mizoram khawpui atana din sak thei tur Kristian Millionaire a hual thu a sawi thudik lo a nihzia thup bo tumna atana hetiang boruak hi zuk siam thar lehah a ngaih theih a, harsa taka Central sorkar tlawn reng ngai lova khawpui thar din sak thei Kristian Millionaire a hualte kha hmala tura hrilh nghal turin ka ngen a ni, a ti.
Kum 10 (decade) dan zela chhiarpui neih thin chu kum 2021 khan Covid-19 avangin neih theih a ni lo tih sawiin Pu Dingpuia chuan, kumin 2025 ah hian chhiarpui neiin nakum 2026-ah tlangzarh hman a nih chuan Chief Minister thusawi dik tawk lohzia hi Mizoramin a takin a hmu dawn a, thudik tawk lo sawi ching ram hruaitu chu tunge tih Mizoram mipuiin a hmu dawn a ni, a ti.
MPYCC Senior Vice President chuan Thalai anih avangin Mizoram thalaite hmakhua a ngai hle tih sawiin, tunhnaiah Mizoramah ruihhlo tawlhtute leh ruihhlo ti an ngampa em em mai hi rorelna kal sualin a hrin a ni a. Rorel lai Minister-te chu Assam Rifles hovin rinhlelh avangin vawi thum ngawt mai an Zokhawthar zin haw buaina an siam sak a. ZPM sorkar leh ZPM party-in a thlavang pawh an hauh ngam lova, Ruihhlo tawlhtute leh ZPM sorkara a fawng vuantuten mipui bum nan programme tha âwm taka lang a huaihawt a, Kan ram chu Ruihhlo thlipuiin min nuai chho nitin a, a nghawng hi a rapthlak tawlh tawlh dawn. Rukruk, tualthah, in suam leh mahni taksa zawrh thlengin nasa takin a hluar a. A nghawng rapthlakzia hi a lang dawn chauh a ni, a ti bawk.
Moses Lalrinchhana Chinzah, President Lunglei District Youth Congress Committee pawhin thusawiin, sorkarin a ngaihsak loh avanga chhim mipuiten harsatna namen lo an tawk chu inzah lohna leh inpawisak lohna a ni tih sawiin, Lunglei (ATL) kawng chhe lutuk siamna tur leh zel pawt peng duh ZPM sorkar chu enchhin zinga enchhin inchhirawm ber a ni, a ti bawk.
