Aizawl, the 5th May 2022: Vawiin chawhnu khan Mizoram University (MZU) chuan Convocation vawi 16-na chu MZU Multipurpose hall-ah a buatsaih a. President Ram Nath Kovind, India rama University zawng zawnga hotulu ber, Visitor of the Central Universities chu he hunah hian khuallian a ni.
Governor Hari Babu Kambhampati, Chief Rector of Mizoram University chu khualzahawm a ni a. Chief Minister Pu Zoramthanga hovin Speaker Pu Lalrinliana Sailo, Pu C.Lalrosanga, MP, Lok Sabha, Agriculture Minister Pu C.Lalrinsanga, I&PR Minister Pu Lalruatkima te, Deputy Speaker Er Lalrinawma, Chief Secretary Dr Renu Sharma, DGP DC Srivastava leh sawrkar mi pawimawh tak tak pawh he hunah hian an tel a ni.
President Ram Nath Kovind, Visitor of Central Universities ni bawk chuan 16th Convocation of Mizoram University a zirlai hlawhtlingte leh an nu leh pa te thinlung takin a lawmpui tih a sawi a. Tun tuma MZU atanga Degree nei leh a ti tha filawr thlanchhuah zinga tam zawk hmeichhia an nih avanga a lawmawm a tih thu sawi a. Mizoram a hmeichhe lehkhathiam rual te hlawhtlinna atang hian India ramah hmeichhia ten nasa takin hma an sawn tih a lang a ni a ti.
MZU ah zirtirtu tha tak tak, research works a hnuhma nei tha tak tak an awm avangin MZU hian tun aia nasa zawkin hma a sawn zel dawn a, a lawmawm tak zet a ti a. NEP 2020 thil tum ber research based Education te, Skill Development, Entrepreneurship leh vocational education te a ni a. Hemi huangah hian MZU in hmalakna thui tak a kalpui tawh a, Department of Science & Technolgy , Government of India nen thawkhoa Incubation Centre pathum lai MZU in a din hi hmasawnna nasa tak a ni a. A bikin Mizoram thalai te, mahni kutkea eizawnna din tum leh midangte tana hna siam tum te tan intahhriamna leh inzirna hmun tangkai tak a ni chho dawn a ni a ti. President Ram Nath Kovind chuan hmannia Governor Hari Babu Kambhampati in MZU tihchangtlunna project Rs 60.31 crore EWS scheme a hawn tak khan nakin lawkah MZU leh Mizorama zirna sang zawk te university tha leh hlun zawkte tlukpuiah a la siam dawn a ni a ti.
President Ram Nath Kovind chuan Mahatma Gandhi in a lo duhthusam thin value & vocational based education chu NEP 2020 hnuaiah tihpuitlin a lo ni ta a, a lawmawm hle a. He zirna policy thar hnuaiah skill development leh vocational education te nasa zawka kalpui a ni dawn a. Mizoram pawhin hei hi hmasawnna kawnga ke a penna atan chhawr hle dawn a. A chhan chu Mizoramah hian ramhmul – thing leh mauah te hausakna nasa tak a awm a. Entrepreneur ten Mau sawngbawlna lam hawia Industry leh Horticulture bakah Floriculture lam an hawi a fuh ber a rin thu a sawi bawk a ni. President Ram Nath Kovind chuan University te chu Company te ang bawkin an awmna state chhunga mipui-vantlang tana rawngbawlna kawngah mawhphurhna an nei tih a sawi uar thin thu a sawi a. Company ten Corporate Social Responsibily(CSR) hmangin mipui-vantlang tihhmasawn hna an thawk thin a; hei ang bawk hian University te pawh University Social Responsibility (USR) a nei a. He USR hnuaiah hian thingtlang khua te chu Model village atan thlangin chu thingtlang khua te tihhmasawnna kawngah tan an lakpui thin tur a ni a. Hemi kawngah hian kan rin phakin MZU leh MZU affiliated college ten hma an la tha a, tawpsan mai lovin tan an la zual leh sauh tur a ni a ti.
Mizoram chu a mawi mai a ni lova, a chhunga lehkhathiam an tam em em a, state ang zawngin lehkhathiam ber pahnihna an ni a. Ramchhung sik leh sa a nuam a, a boruak a thianghlim in biodiversity ah a hausa em em a ni a ti. Mizoram leh hmarchhak biala Biodiversity hi humhalh chhunzawm zel ngai a ni a ti a. Environment tichhe lo zawnga hma la tura intiam zingah India a tel a – kum 2030 a lo thlen huna tihhlawhtin tur tam tak kan nei a. State pawhin State Development Goal hnuaiah tihtur an nei ve bawk a.He hmalakna huanga NITI Aayog in state hnathawk tha a thlanchhuah zingah Mizoram chu a titha ber pawl 60 score nei a ni thei hi a chhuanawm hle a ni a ti. Sarang vawikhat chiah hman theih hman khapna kawngah pawh a titha ber te zingah Mizoram a tel leh hi chhuanawm ka ti a, ka lawmpui bawk che u a ti.
Mizoram chu hun reilote chhungin sumdawnna hmunpui, India hmarchhak tihhmasawnna kawnga state pawimawh tak a ni chho dawn a, International ramri thui tak – Myanmar leh Bangladesh te nen an intawmna hi Border trade tihhlawnna hmun remchang a ni chho mek a, KMMTTP thawh zawh a nih hun phei chuan India hmarchhakin a thawhchhuahte ram danga a thawnchhuahna kawtchhuah pawimawh tak a ni dawn bawk a ni a ti.
President, Governor, Chief Minister leh Convocation puipaten Convocation kawrfual an hak hnuiin Degree dawng tur zirlai hlawhtling te hi Hall-ah an hruai lut a. Hemi hnu hian Vice Chancellor Prof KRS Sambasiva Rao chuan Convocation neih tan a ni tih a puang a; thuhmahruai nei hmasain 16th Convocation of Mizoram University report a pe chhunzawm nghal a ni.
MZU hi kum 2001 khan din niin a Campus zau zawng hi 978.19 acres a ni. Hun reilote chhungin MZU chuan kawng tinrengah hma a sawn a. India ram zirna lian dangte laka MZU danglam bikna chu a chhungah Ragging a awm ve lova, a chhuanawm em em a ni a ti. Tunah hian MZU tihhmasawnna tur project lian tham tak tak te Rs 250 Crore hmangin thawh mek a ni a ti bawk.
NAAC in kum 2014 leh 2019 khan MZU hi a endik hnuah Grade ‘A’ a pe a. Kum 2016 leh 2021 inkarah khan NIRF chuan MZU chu India rama University thazual Top 100 zingah a dah a ni. MZU hian Academic department 38 a nei mek a. UG, PG, M.Phil leh PhD zirna School of Study 6 hnuaiah a kalpui a. Constituent College 1 neiin affiliated college 35 a nei tih a sawi a. Tunhnai kum 4 chhungin MZU chuan Zirna thar ( new courses) 9 a hawng thar a, Constituent College – Pachhunga University College-ah Zirna thar 5 a hawng leh bawk a. Chanchinthar ber an hriat danah Mizoram University Southern Campus chu Lungleiah kalpui a ni thei tep a; Ministry of Education pawhin rawtna thehluk hi an pawm thuai a beiseiawm hle a ni a ti.
Tunhnai kum 5 chhungin Incubator Centre 3 – DST-Technology Business Incubator, DBT-BioNEST Incubator leh DRDO-Academia-Industry Centre din a ni a. Hei hian Entrepreneurship leh Skill Development kawngah Mizoram thalaite tan malsawmna a thlen ngei dawn a ni a ti. MZU chu NEP-2020 tun session atanga kalpui thei University tlemte zingah a tel pha tih a sawi a. Tunah hian Zirtirtu leh hna dang thawktu posts awm zat atanga chhiara 95% lai hnawhkhah mek a ni a ti. He hlawhtlinna lian tak a lo thlen theihnan hian Governor leh Chief Minister lo ni tawh te leh ni lai te bakah MZU a thawktu a te ber atanga a lian ber lo ni thin leh tuna mi ten an thawh hlawk hle tih a sawi a. Tun Convocation vawi 16-naah hian degree, gold medal leh prize dawngtu 7830 an awm a; hrileng avangin mi 545 chiah a hmunah sawm an ni.
Degree inpekna hun neih a nih hnuah lawmman leh Degree hlanna hun hman a ni a. Chief Minister Pu Zoramthanga’n Book Prize dawngtu zinga mi 3 thlanchhuah hnenah lawmman a hlan a. PhD Certificate hmutu 68 zinga mi 10 thlanchhuah hnenah Governor Hari Babu Kambhampati chuan Certificate a hlan a. Gold Medal dawngtu 38 zinga thlanchhuah mi 10 hnenah President Ram Nath Kovind chuan tangkapui leh thuziak a hlan leh a ni. Lawmman leh Degree semna neih hnu hian he Convocation pual thuchah President Ram Nath Kovind chuan a sawi a. Lawmthu sawina hun Registrar Prof Lalnundanga chuan neiin Convocation hi khar a ni.
