Mizo National Front
General Headquarters
Aizawl : Mizoram
Press Release
*MNF Policy & Programme Board Meeting Vawi 3-na neih a ni.*
Vawiin 11.6.2025 khan MNF chuan Policy & Programme Board Meeting Vawi 3-na an nei a, țhalaite hna thawh tur siam sak leh, hnathawk thei tura thiamna neia țhalaite chher chhuah dan tur sawi ho zingah a langsar ber a ni.
Thiamna bik leh tawn hriat chi hrang hrang neite telna MNF Policy & Programme Board Meeting hi Mizo Hnam Run, President’s Chamber-ah neih a ni a, Board chairman MNF Sr. Vice President Dr. R. Lalthangliana, Health Minister hlui chuan sorkarna siam leh tura inbuatsaihna ngawrh taka an kalpui chhoh mekah Zoram mipuite tana innghahna tlak Policy leh Programme, a taka kalpui theih tur duan chhuah a țul tih sawiin member te chu uluk taka ngaihtuahna seng turin a chah a ni.
Sawihonaah hian mipui nawlpuite an damloh nikhuaa an inenkawlna, Mizoram Health Case Scheme mumal zawka duan dan tur huam zau takin an sawiho a. Tuna ZPM sorkarin Mizoram Universal Health Care Scheme a kalpui mekah ruahmanna fel lo tam tak a awm avanga miretheite tawrhna thleng mek chungchang te, Sorkarin Pvt. Hospital te in biak remna a neihpui hmasak loh avanga damlo ten an tawrh mek dan leh Sorkar Damdawi In-a khum chang si lo, Pvt. Hospital ban phak bawk si lo, manganna tawk mek damlo tam tak an awm thu țhutkhawmah hian sawilan a ni.
MNF Policy & Programme Board vawiina țhukhawm hian thil dang bakah mizo țhalaite tana hna thawh tur tam zawk siam belh leh, hna thawk thei tura thiamna neia țhalaite chher chhuah chungchang chu an sawiho zingah a langsar hle a. Hemi kawngah hian policy țha leh rintlak duang chhuak ngei turin fimkhur tak leh uluk taka zirchianna kalpui nise an ti.
Țhutkhawmah hian MP, MLA, Ex MLA, dan hre mite leh, kawng hrang hranga thiamna bik leh tawnhriat nei zau tak takte an tel a ni.
