India rama sawrkar damdawi in tha bik tehnaah Mizoram chhunga damdawi in pariat – Kawnpui PHC, Pangzawl PHC, Chhingchhip PHC, Hrangchalkawn UPHC, Lungsen PHC, Cherhlun PHC, Sangau PHC, leh Chhuarlung PHC te an tel thar.
Dr. Lily Chhakchhuak, Mission Director, National Health Mission, Health & Family Welfare Department atanga thu kan dawn danin, India rama sawrkar damdawi in tha bik tehna, National Quality Assurance Standards (NQAS)-ah PHC pasarih lai mai an tling thar a, a tehnaah Kawnpui PHC – 91.42 %, Pangzawl PHC – 96.26%, Chhingchhip PHC – 93.80%, Hrangchalkawn UPHC – 93.35%, Lungsen PHC – 88.22%, Cherhlun PHC – 89.66 %, Sangau PHC – 89.03 %, leh Chhuarlung PHC – 95.30% te an hmu a ni. Heti hian Mizoram PHC zingah NQAS National Certificate hmu hi 19 an awm ta a, UPHC hi 3 a awm ta bawk.
Heti hian Mizoram chhunga Sawrkar damdawi in 29 te chu NQAS national certificate nei tawh an ni a. Tunah hian NQAS state level certificate nei tawh sawrkar damdawi in 12 te national assessment hmachhawn tur an awm mek.“Health Minister, Pi Lalrinpuii chuan, India rama damdawi in tha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu leh damdawi in, district leh state-a thawktu zawng zawng te thawhrimna leh taimakna chhuanawm a tih thu sawiin, he’ng tehna te hi Sawrkar damdawi in pantu damlote chu a chhawr tangkai bertu tur an nih thu a sawi.
