Lalrinpuii, Health Minister chuan vawiin khan a office chamber-ah May ni 30-a Nurse chawimawina sang ber National Florence Nightingale Award dawngtu Pi V.Lalhmangaihi, Nursing Officer, Civil Hospital Aizawl hnenah Mizoram sawrkar aiawh chawimawina Citation leh tangka fai a hlan.
Vawiina he chawimawina hun hi Pi Lalnunmawii Ralte Joint Secretary H&FW in a kaihruai a. Pi Lalchhanhimi, joint Director, Nursing H&FW Deptt. in Brief Report leh Introduction hunte a hman zawh hnu-ah Health Minister Pi Lalrinpuii chuan award dawngtu Pi V.Lalhmangaihi hnenah Mizoram Sawrkar aiawh chawimawina citation leh lawmpuina tangka fai Rs.50,000/- a hlan a ni.
Health Minister Pi Lalrinpuii chuan,”India ram state hrang hrang mipui tam tak karah Mizo zinga Florence Nightingale Award hial la thei kan awm thin hi lawmawm ka ti a. A dawngtu Pi V.Lalhmangaihi thawhrimna leh inpekna hi a entawn tlak tak zet a ni,” tiin nursing care-ah hmasawn zel turin thawktute a chah nghal bawk. He hunah hian Mizoram atanga he award lo dawng tawhtute zinga Aizawl District-a awm mi panga te pawh sawm tel an ni bawk.
Tin, Pu H.Lalengmawia IAS, Secretary HFW leh Dr. SR Ngurchamliana, Director HME te pawhin lawmpuina thu an sawi bawk. He Award dawngtu Pi V.Lalhmangaihi pawhin he lawmman dawng thei tura a tul anga buaipuitu Mizoram Nursing Council chungah lawmthu a sawi a. Tin, Mizoram sorkarin Cabinet pawmpuina thlapa kumin atanga dan mumal tak siama lawmpuina citation leh cash award Rs 50000/- a hlan tel chu thinlung taka a lawmzia thu a sawi.
Tarlan tawh angin National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 16 in he chawimawina hi an dawng tawh a. Kumin a dawngtu Pi V Lalhmangaihi hi 17-na a ni. Mizo nurse, state pawna thawk pahnihin an dawng tawh bawk a ni.
He chawimawina hi Central, State/UT leh Voluntary Organisation hrang hranga thawk nursing personnel chhuanawm tak takte hnena hlan thin a ni. Damdawi in emaw, khawtlang emaw, zirna emaw, enkawlna hmun a hna thawk tha bik, nunna chhanchhuah leh hun khirh tak kara hriat reng tlaka thawk nurse-te tan ram pum huapin he chawimawina hi hlan thin a ni.
He chawimawina dawng tur hian India ram state hrang hrang atangin nurse hna thawk tha bikte nominate a ni thin a, recommendation te chu Central Sorkar-ah thawn thin a ni. Central Sorkar chuan committee bik siamin dawng awma an ngaihte an lo thlang leh thin a ni.
