Nimin khan Chief Electoral Officer Dr.Lalrozama chuan a pisa-ah Mizoram a media mi thenkhatte kawmna neiin, election kaihhnawih hriat tur pawimawhte media kaltlanga mipui te hnena thehdarh dan tur chungchang a sawi pui a. Elecection Commission of India chuan Election leh a kaihhnawih chungchang zirchiang turin Ram 36 a thlan chhuah zingah Mizoram chu Switzerland tihdan/kalpui dan zir chiang tura a tih thu a sawi bawk.
Inthlan chungchang kaihhnawih sawihonaah hian Election Photo Identity Card (EPIC) / Voters ID-a adress inziak leh a taka adress inmil lo tam tak a awm chu CEO hian siamthat dan la ngaihtuah tha a tih thu a sawi a, media lam te chuan EPIC / Voters ID hi siamthat a buaithlak avangin tam tak siamthat chu a harsat an rinthu an sawi.
Election office lam chuan EPIC / Voters ID hi online hmanga siam that theih a nih thu an sawi a, Voters helpline App leh Voters Service Portal-ah te online hmangin siamthat dilna thehluh theih a ni a, document neih ngai erawh a awm thu an sawi a, heng application te hi hman harsa lo tak a ni an ti.
CEO, Mizoram chuan ECI-in Elector te hnenah rang zawka EPIC / Voters ID pek chhuah zel a tum. Ruahmanna thar ang chuan Electoral Roll-a update hrang hrang tih atanga ni 15 chhung ngeiin EPIC hi Elector-te kuta hlan hman turn a ni. Hei hi electoral roll-a inziak lut thar emaw, vote nei tawh engemaw tihdanglam ngaite pawh a huam vek a ti.
