Vawiin khan Mizoram sorkar chuan thuchhuah siamin, Mizoram Universal Health Care Scheme (MUHCS) kalpui mekah Private Hospital intelkhawm pawl – Non Government Hospital Association, Mizoram(NGHAM)-in Ni 17th June, 2025 khan Press Release hmangin an dinhmun an rawn tarlang a. He Press release ah hian thil hriat famkim loh leh hriat chianloh-te awma alan nual avangin Sawrkar chuan mipuite hriat atana thil awmdan diktak a hnuai ami ang hian a tarlang a ni,” a ti.
1. Private Hospital intelkhawm pawlte hian Cashless avangin nitin sum lut awm lo tura an ngai hi Sawrkar lam chuan Cheng Nuaih 50 advance a pek a inhuam reng a, Tin, kar tinin damdawiin bill hi pek thin a ni a, an buai lo turah a ngai.
2. MUHCS rate hi 50%-80% vela hniam zawk anga sawi hi hriatchian loh vang niin a lang a. Entirna pakhat han tarlang ila. Aizawl chhunga Private damdawiin lian atanga Mizoram State Health Care Society in kum hmasa lama claim a dawn atanga chhutin, Rilphir zai (Appendicectomy) senso chu chawhrualin Rs.36,250/- (room luah man telin) a ni a. MUHCS hnuaiah hian Rilphirzai hi Base rate Rs 25,000/- tih ni mahse heng damdawiin lianah hian additional incentive an dawn tur zat nena belhkhawmin he Rilphir zai package rate hi Rs.32,500/- atanga Rs.35,000 thleng a ni thei a. Damlo chu a entitlement a zirin Cabin ah emaw Semi Cabin ah a awm anih chuan room man hi he package rate tarlan piah lamah hian damdawiin ten an bill belh thei bawk. Chuti chuan Room luah man nen chuan Rs. 36,250 ai hian a sang zawk dawn a ni.
3. Phai lam Hospital leh Mizoram Private hospitalte hi Rate chungchangah te, Quality chungchangah te, Grading chungchangah te khaikhin chi a ni lo a. Chutichung chuan Sorkar chuan, Mizoram Private Hospital-te chu duattakin Phai lam hospital te nen rate inang tlang a offer bakah, hemi piah lamah pawh hian sawipui a la inhuam cheu a ni.
Tin, Phai lam Non-empanelled Hospital te, reimbursement phalsak anga sawi hi a dik ziktluak lo bawk. MUCHS guidelines 3.12.2/10.3.2 ang chuan emergency-ah emaw Empanelled Hospitals ten an enkawl theihloh natna bikah chuan Phai emaw Mizoram chhung pawh ni se Non-empanelled Hospital-ah chuan reimbursement theih reng a ni.
4. Mipui nawlpui, a bikin mi harsa zawk te leh sawrkar hnathawk tam takte chuan damloh nikhuaa inkhulh chhuahna tur sum an neih loh dan te, puk chawpa inkhul chhuak te leh, mahni in leh lo hial tihral ngai khawpa mangang te an awm thin, tih a hriatpui avangin Sawrkar chuan cashless-in Mipui Healthcare hi a kalpui mek a. Hei hi Sawrkar chuan mipui tan tha a ti hle a ni.
5. Sorkar chuan mipuite hmakhua ngaiin Private Hospital te nen inrawn tlanga, dawhkan khat kilho a inbiakremna kawng zawn zel hi a duh dan a ni.
