Mizoram Pradesh Congress Committee chuan vawiin khan Congress Bhavan-ah Friday Political Session an hmang a, he hunah hian MPCC President Pu Lal Thanzara chuan thu sawiin, “Party pahnih Congress leh MNF kan in sawrkar chhawk thin a, tunah ZPM an rawn sawrkar ve ta a, chuta ka ngaihtuah chu ‘Tuhrah seng’ tih hi a ni. Vanah leh leiah tuhrah kan seng dawn tih hrereng in politics a hmalaknaah pawh kan fimkhur a ngai a ni.
“MNF sawrkar laiin ‘Thluaka sum lut’ tih leh ‘Kamrula’ tih a lar em em a, kan CM hlui leh Kamrula Combination kha ‘Sweet Combination’ an ti hial a ni. Kan Airport a Kamrula hnathawh pawh kan CM hlui khan Inrinni tin a enpui thin an ti a, chutichung chuan a nih tur ang a ni pha lo hle a ni. Chu chu mipui tuh rah a ni.
“ZPM enchhin sawrkar a lo piang leh a, an campaign laiin thil tha tinreng min tiam a, VIP culture nuaibo te thlengin min tiam a, mahse an insawi loh ang zelin an awm a, sawi sawi ngai lovin mipuiin an hria. ‘Kum 15 daihin kawng kan siam ang’ an ti a, thla khat pawh daih lo kawng an siam a, tuilet hnu a kawng chhiat ber tum Mizoramin kan tawng mek a ni. Hei hi mipui tuh rah a ni. ZPM hian kan ti ang an tih an ti lo fai vek. VIP culture tihbo, restricted tender tihbo, sawhthing lei zawh vek, VUC in minister corrupt tur a veng ang tih te, thil tam tak min tiam a nih kha. Duh se chuan ZPM hian thil tha tih theihna hun an nei tha ber a, mithiam te, celebrity te leh mi tha tak tak pawh an nei, mahse tumna tak tak an nei lo a, mi thenkhat chuan an term pawh an hman zawh an ringlo hial tawh a ni.
“Congress sawrkar lai khan NLUP hmangin mipuiten malsawmna tam tak an dawng a, eizawnna bul an tanna tur te an dawng a, Remna leh muanna te a thleng a, sawrkar hnathawkte thla a muang a, ram thenawma kan unaute thlengin an thla a muang thin. Chu chu mipuite tuhrah a ni. Mipuite pawh hian an ngaihtuah chian a ngai a, kan tuhrah kan seng thin avangin uluk taka kan ngaihtuah a ngai a a ni.
“MNF sawrkar lai, kum 2018-2023 chhung khan School Education Department hnuaiah advertisement chhuah lovin hna 695 lai lak a ni a, khang zingah khan a tha ber leh a tling ber la lovin an duhsak zawng an la anih chuan kan zirna chu a ngaihtuahawm hle ang. Hmani lawka kan thalai MPYCC te PR a kan hmuh angin NABARD sum an puk vaibelchhe 3,500 hmanga school sak leh repair chungchangah thil dik lo tam tak a awm avangin Lok Ayukta ah thubuai an thehluh chu tunah hian ngaihtuah mek a ni a, thudik kan hre thuai turah kan ngai a ni.
“Kan sawrkar hian Mizoram Universal Health Care te hi ngaihtuah nawn leh se ka duh a ni. Kan sawrkar hi inphah hniam se, Private Hospital te nen pawh inber rem se ka duh a ni, hetiang anga a kal chhoh hi chuan mirethei ten an tuar thin a, ZPM sawrkara mi pawimawh te chuan sum an nei a an tuar lo, a tuartu tur chu mipui, mi harsa zawk te an ni. Chuvangin sawrkar hian mipuite hmakhua ngaiin hma la se, inhnukhniam se ka duh a ni. Pathian leh mipui khawngaihna zarah Congress party kan sawrkar leh anih chuan Health Care tun aia changtlung zawk hi kan kalpui ngei dawn a ni tih ka sawi duh bawk a ni.
“Tin, Congress mi leh sa hmun danga peng tawh te ka ngen duh chu, kan ram siamtha a, NLUP din thar leh a, ram hmaswnna tluantling thlen turin Congress ah rawn let leh turin tih takzetin ka sawm che u a ni. Tunah pawh Congress party a rinna nghat a min rawn zawm an awm zel hi a lawmawm em em a ni.” a ti bawk.
