Nimin 20-06-2025 Zirtawpni khan Mizoram Pradesh Congress Committee chuan Congress Bhavan-ah Friday Political Session an hmang a, he huna thusawi tu MPCC General Secretary, Ex MLA ni bawk Pu Joseph Lalhimpuia chuan thu a sawi a, “Mizoram Engineering College chungchangah MNF Party hian Zoram thalai leh chhimlam mipuite hnenah ngaihdam dil rawh se.” a ti.
Pu Mahima chuan, “Kum 2014 ah RUSA component 6 (new professional college) of RUSA 1.0 hnuaiah College 4 tan project thehluh a ni a , heng zinga mi Lunglei Engineering College din chu RUSA project approval board chuan pawmpuiin ₹26 Crore a pe nghal a. Pukpui khawtlang ten ram zau tak 1000140 Sqm /24.9 acres a thlawn a pe in, College building hi 22 April 2016 ah sak tan a ni. November ni 16, 2018 ah sak zawh a ni. PM Modi chuan 2019 khan a hawng tawh a, 2019-2020 academic session chhunga class tan hman turin a hriattir nghal bawk. Tun thlenga a thlen chin kan hria, eng vang nge? An sorkar chhung khan department lamin budget a dah an dilna te, NEDP balance an dilna te, 14th Finance Commission a an dilna te, Planning dept kaltlanga NESIDS a an dilna te, NEC leh Special Assistance to State for Capital Expenditure atanga an dilna te Sorkarin a tihlawhchham fai vek a, State sorkarin priority dan a zira pek theih vek a ni. An sorkar chhunga an tihhlawhtlin chu 2023 tir lama boundary pillar phun zawng a ni mai. MNF hian ngaihdam an dil ngei tur a ni.
“Sorkar laipui chuan sum tam tak a pek, PM Modi meuhin a hawn tawh la hlawhtling lo ti hlawhtling tura State sorkar na taka a rawn nawr tak avangin CM hovin 28 December 2024 khan meeting an ko chuk chuk a, Cabinet meeting 13 April 2025 chuan thawktu 65 lak an rem ti ta, kalkawng, eng leh tui bakah building repair leh tul dang atan ruahmanna an siam zui ta bawk a, a lawmawm hle a ni. Congress party hmalakna, PM meuhin a hawn tawh kum 7 hlamchhiah anih hnuah chhunzawm a ni leh tur hi Congress party chuan lawmawm a ti tak zet a, a hlawhtlinna hmuh thuai kan inbeisei a ni.
“Mizoram mipuite’n kan mangan pui, khawvel thiamna pawhin a la tih dam hleih theih loh cancer natna hian Mizote min run mek a. Mizoram Population based Cancer Registry-a a lan danin kum tin mi 2000 chuang Cancer vei hmuh chhuah thar kan awm a, kum tin sang chuang an thi ziah bawk. Hetiang hi kan dinhmun anih laiin India rama cancer enkawlna tha ber ber Mizo cancer veite pan thin Tata Cancer Institute Mumbai & Kolkata te CMC Vellore te pawn Mizoram Healthcare hi an zawm ve loh avangin he ta kalte tan bill ve theih a ni lo. Cancer enkawlna hautak zia ngaihtuahin Mizoram sorkar hian cancer veite hi ngaihsak se ka duh hle mai.
“Medical board tih tawp a ni leh zelin a nghawng nat zia hi ngaihtuah uluk a tul tak zet a ni. Sorkar record atanga a lan danin kum 2007-2010 inkar ringawtah khan Medical Board Civil Hospital Aizawl atang ringawtin mi 11306 chu State pawna inenkawl ngai refer an ni a. Hemi atana senso ho Rs 40 Crore vel ni tura chhut theih a ni a, Lunglei medical board te nen phei chuan Rs 80-90 crores vel zet state pawn damdawiinah kan seng thin a ni. Hetiang anih lai hian medical board tih tawp a ni a, Healthcare empanelled hospital a Specialist Doctor ten an ziak chu Society in a refer ta thin a ni. Heng Empanelled Hospital te hian Clinic an nei tan hlawm a, a thil ken tel kan hre thiam mai awm e. Zoram pawn Hospital lianah sorkar hriatpuina leh enzuina awm lutuk lovin sum a luang ral nasa thei dawn a, enzui a tul tak zet a ni. Mizoram chhung private hospital te hi kan hotute thusawi thenkhata a lan dan phei chuan thla 3 pawh daih mang lo tur ti a lo sawi te an awm a, Private Hoapital te vau zawnga thu sawi te hi a puitling lo hle. Health care avanga buaina ah hian a tuartu chu mirethei an ni a, sawrkar a a fawng chelhtute, mi hausa tak tak hian an tuar dawn lo. Chuvang sawrkar chuan pa chan changin mipuite hmakhua ngaiin he buaina hi chingfel se a lawmawm ngawt ang. Ram hruaitute hian mipui mamawhna thlir thiam se ka duh tak zet a ni.” a ti bawk.
