ZPM party chuan vawiin khan chhung inkhawm Party Office-ah an hmang a, Agriculture & Farmers Welfare Minister PC Vanlalruata chuan thu sawiin; thlai thar market buaipui tak tak tur chuan thlai bawh bik kan neih a ngaih thu a sawi a, nakkum atangin hmunphiah ro chu grade sawi lovin sorkarin a lei dawn thu a sawi bawk.
Agriculture Minister chuan, “ZPM sorkar hi a lo din tirh atanga vawiin thlengin Zoram mipuite tan a ding reng a, ‘Sorkar hnathawkten min dem mai ang’ tih hlau chungin aikal lak kan titawp a. Sum leh pai tam tak sen a ngai dawn tih hre reng chungin thlai thar lei kan buaipui mek bawk a ni. Thlai thar lei chungchangah hian kan Chief Minister a fakawm tak zet a ni. Sum leh pai harsatzia leh Sawhthing rate chhiat ber kum a ni tih hre reng chungin Kuthnathawktute tihbeidawn a duh lo a, a department changtu Minister ka nihna ang pawhin ka lawm tak zet a. Zoram kuthnathawktute lawmthu sawina pawh ngaihthlak a nuam hle a ni,” a ti a.
Minister chuan, “Sorkarin direct-a Sawhthing a lak zat hi Qtl. 94,160 a ni a, support price a pek zat hi Qtl. 1,21,740 a ni tawh. June ni 21, 2025 thlenga Sawhthing lak tawh zat belh khawm chu Qtl. 2,15,900 zet a tling tawh a. Sawhthing rate chhiat ber kumah pawh sorkarin cheng vaibelchhe 85 chuang a seng tawh a ni. Hmunphiah chungchangah Empanelled Firm ten sorkar rate anga lei turin an intiam a, an intiam anga an kal leh tak loh avangin kan bul tanna a fuh hlel deuh hlek a, chuti chung chuan ZOHANDCO kal tlangin kumin March thla chhung khan Sorkarin Kg. 2,49,828 a lei a. Kum a lo thar ang a, hmunphiah ro chu grade sawi lovin sorkarin a lei dawn a ni,” a ti.
ZPM party chhung inkhawm hi R.Lalthanzama GS chuan a kaihruai a
