Aizawl Tennis Court leh a chhehvela Inrinni apianga mipui mamawh chawhmeh leh thil dang Zuara in pho thinte chuan vawiin khan Aizawl Press Club ah chanchinthar lakhawmtute kawmin, “Ni.21.6.2025 a kan lungawi lohna lantir nana motor kawng kan dân tuartu zawng zawng chungah ngaihdam kan di| a. Chutih rual chuan kan dinhmun hrehawm tak hi min hriat thiampui turin zoram mipuite kan ngen a ni,” an ti.
Tennis Court chhehvela thu thinte chuan, “Helai hmunah hian Inrinniah chauh kum 2000 hmalam atanga thu tân tawh kan ni a Kan thutna hi veng pahnih, Tuikual South leh Venghlui area a awm ani a, veng 2 VC/LC ten seat ruahmanna te, bawlhhlawh tih fai, Street light leh tul dang hrang hrang min ngaituahsakin min enkawla kan lâwm thin hle. Tin, Aizawl Municipal Corporation a lo pian hnuah pawh India dân siam The Street Vendors (Protection of Livelihood and Regulation of Street Vending) Act, 2014 hmanga kan dikna leh chanvo te humhmin theih a nih dânte min hrilh a. Kawng chhuata kan chawhmeh zawrh te chu a thianghlim tawk loh hlauvin kum 2017 khan, kan thil zawrh dahna tûr dawhkante min pe vek bawka, ID te min siam sakin thawh hona tha tak kan neia, kan lâwm hle a ni.
“Tun hnaiah AMC Multicomplex Building, Tuikual South-ah sak a ni a, he building hi, Treasury Bazar a thu te sâwn luhna tûr atana ruahman a ni a. He laia sawifiah ngai chu, Treasury Bazar-a kar tluana thute leh keini Inrinni chauha thu te hi hriat pawlh kan ni leh thin hi a ni. Thuhmun ni lovin a hrang hlak kan ni. Building sak hi keini Inrinni chauhva kawng kama thu thinte tana ruahman ni lovin, Treasury Bazar-a kar tluana thu te tan liau liaua sak a ni.
Building-ah hian Bazar atana siam chu floor 2 a ni a, a dang chu parking, Market leh hall te an ni.
“Chawhmeh zawrhna floor hi chhawng 3-na leh chhawng 4-naa awm a ni a. Chawng 4-na ah hian Treasury Bazar-a thu thin mi 80 chuang hret te chu an thu mek a. A chung chiah chhawng 5-na hi tender chhuah niin chumi zînga 17 te chu an thu mek bawk. Tender hi Inrinni bazar-a thu thin tam takin kan chhâng ve a, mahse hmu kan awm meuh lo a, chawhmeh zuar ngai ni lem lo te pêk an ni nual thung si. Kan zinga mi thenkhat tender chhânna chu office lamah hmuh zawh tak lohvin a bo tihte a awm nual bawk.
“Kumin March thla inrinni hnuhnung ber khan thuneitu ten building sak tharah chuan lut turin min rawn nawr ta thut a. SMART CITY kalpui mekah veng dang kawng dunga in zuar te pawh tih tawp vek a ni dâwn an tih avangin thu awih takin kan lut a. Mahse thla thum hnuah pawh hmun dang bazar tih tawp tumna reng reng a awm lo tih hriat a ni a. Tin, a tirah chuan building chhawng hnuai lam parking a motor te dah chhuahtirin min thut tira, kawng bul mai te a nih avangin kan in hralhna pawh 2 la zia deuh.
“Hun a kal zela inrinni apiangin kan thut dân min tih danglamsak a, kan thut na chu nawr zim telh telh a ni a, tûnah chuan building chawng 4-naah mi 80 vêl thut theihna tura siamah mi 200 dawn min hnawh lut ta a ni. A then step-ah te min thuttir a, min dawrtu te kalna pawh awm mang lovin min siam a. In hralh a harsa em ema, kan thutna kan sawn fo avangin kan regular customer ve te pawhin min hmu zo ta lo fo nen, kan mang ang tawh hle a ni. Hmun dang kawng sira in zuar te dawr awlsam tak a nih laiin keini thutna building chhawng 4-na chu pan a buaithlâk bawk Si a, kawng sira kan thut thin
laia kan lei chhuah chanve pawh kan lei thei ta lo a ni.
“Building chhawng sang, a dawrtute tana kal harsa em emah chep taka thut reng hi kan tan awmzia a awm loh avangin Aizawla thuneitu AMC te hian kan harsatna te min hriatthiam puia, kum tam tak kan lo kalpui tawh leh kan thut dan ngaia min thuttir leh turin kan ngen tak meuh meuh a. Tin, zoram mipui te pawh he harsatna hi min hriatthiam puia min support turin kan ngen bawk a ni,” an ti bawk.
