Vawiin ni 27.6.2025 (Zirtawpni) hian Congress thalai buatsaihin ram buai avanga nunna chan Martarte Lungphun champha vawi 28-na hun Volunteers Building, CTI, Sesawng-ah hman a ni.
He hun hmanpuitu MPCC President Pu Lal Thanzara chuan, “Congress chuan kan ti ang kan tih hi kan tih thin avangin mahnia lal thutthleng kalsan Kohhran leh Mizoram mipuite beisei remna leh muanna kan nei. MNF chuan Hnam pasalthate leh Martarte Politics khelh nan chauh an duh. An sorkarin an theihnghilh a, an sorkar loh veleh an hmangaih leh thin,” a ti.
Pu Lal Thanzara chuan, “Congress sorkar chuan Martarte hriatrengna atan leh kan zahzia lantir nan an chhungte hnenah sorkar hna chhungkaw 30 chuang kan pe a, hnathawh tur inhlawhna pawh thahnem tak kan pe a ni. Hetiang hian Mizoram mipuite tan thlei bik awm lohna sorkar tha kan siam dawn a ni,” a ti bawk.
Pu C. Ngunlianchunga MLA chuan, “Kohhran ten chanchintha avanga Martarte pualin hun kan hmang thin a. Zalenna sual a, rorelna tha leh hnam anga dinchhuah tuma ram leh hnam tana nunna hlu tak hlantute tana hriatrengna Lungphun a anmahni puala hun hmang thin chu Congress Party chiah hi a ni,” a ti.
Pu Ngunlianchunga chuan, *MNF leh ZPM te hian mipui vote an hmuha an bum theihna turin thil tinreng an tiam a. Tuna kan hriat mek MNF leh ZPM kal dan hi chuan a mai maia ram rorelna fawng chelh hi a ni ber a. Kan Martarte Martar chhan a ni lo tih sawiin, Pathianin mitin thleng phak chanchin tha min pe a, Pathianin Congress Party hmangin Mirethei te, pachhia te, mi chhumchhia te hnen thleng phak hmasawnna min pe thung a ni. MNF leh ZPM sorkarah Pathian thlarau harhna kan dawng lova, Congress party sorkarah Pathianin thlarau thianghlim Harhna min pe a, Mizoram mipui kan thla a muang hle a ni,” a ti bawk.
He huna thusawitu MPCC Adviser Pu Zodintluanga chuan, MNF leh ZPM sorkarah mirethei ten ngaihtuah an hlawh lova. Tuna mirethei te chunga vaivut tlemte pawh it a chhiah nasa taka tihpun hi meiling an lu chungah an chhek khawl tihna a ni a. Kum 2028-ah heng mi harsa leh retheite hian Vote hmangin an chungah ro an rel ve tawh dawn a ni, a ti a. Congress sorkar Mizoramin a an duh leh tawhzia chu chhiatni thatniah pawh kan bulah bak an awm duh lo leh tawh a ni, a ti bawk.
He hunah hian MPYCC President Pu Laltawnliana chuan, Hnam tana Martarte hian Zofate min phuar phuarkhawm a. He hmunah hian kan thinlung a in fawk khawm a ni tih sawiin, Ram leh hnam tana kan intiamnaa rinawm leh intiamna hlenchhuah hi martarna a tling a; Congress Party hi Mizoram mipui tana remna leh muanna thlentu ni tura mahni lal thutthleng kianin a martar tawh a, mipuite tana a intiamna zawng zawng a hlenchhuak a ni. Hetiang ang ram tana mahni nihna hlan ngam hi party dang an awm ve lo. Congress Party hi Zofate min phuar khawmtu awm chhun a ni. Party dang pàhnih hi chuan lal hrim hrim duhin mipui bumna atan Zeldin thu an sawi kual vel mai mai a, ram tana mahni inhlan khawpa Martar nun hi an hlat hle a ni, a ti.
Congress Thalai hian MP leh MLA boral tawh pualin anmahni hriatrengna thing phun hnatlang an nei tawh a. CTI, Sesawnga Martarte puala Lungphun hi kum 1997 khan hetih laia Congress Thalai President, Pu John Rotluangliana, Ex-Minister hova phun niin kum 2022 khan a champha Silver Jubilee lawmna ruai nen lawm a ni a. Lungphun hi Feet 35 a sang, hmai pali neiin, hmai pakhat hlai zawng hi feet 15 vek a ni a, hemi atan hian Rs. 35,0000 sen a ni. June ni 27, 1997 khan hetih laia Chief Minister Pu Lal Thanhawla’n ropui takin a hawng a ni.
