Mizo National Front General, Headquarters chuan thuchhuah siamin, “June ni 30 khan Chief Minister, Pu Lalduhoma chuan Irrigation & Water Resources department conference hall-ah ZPM sorkar chu kuthnathawktute Ipte-a pawisa thun hnem ber a nih thu a sawi a. A thu sawi hi belhchiandawllo, amah ngei pawhina a awih loh tur a ni a. Pu Lalduhoma hian eng tehna nge a hman tih hi MNF chuan a zawt a ni,” an ti.
Thuchhuahah chuan, “MNF sorkar liam ta khan SEDP ‘Pilot Project’ atan kum 2019-2020-ah vawk vulhtu chhungkaw 220-te hnenah Rs.300,000 (nuai thum) ṭheuh, a vaiin Rs. 66,000,000/- (vaibelchhe ruk leh maktaduai ruk) an Ipte-ah a thun sak a. Ar ‘Broiler leh Rainbow Rooster’ vulhtu chhungkaw 800 hnenah Rs.150,000 ṭheuh, a vaiin Rs. 120,000,000/- (vaibelchhe sawm leh pahnih) a pe bawk. Sericulture hnuaiah chhungkaw 425 hnenah Rs 150,000 ṭheuh, a vaiin Rs. 63,750,000 (vaibelchhe ruk maktaduai thum nuai sarih leh singnga) kuthnathawktute Ipte-ah a thun sak bawk a.
“Hemi hnu hian hripui lêng, Covid-19 pandemic vangin SEDP chu chhunzawm theih ni rih lo mah se, kum 2021-2022 Financial Year atan SEDP hnuaiah kuthnathawktu chhungkaw 60,000 (sing ruk) te tan Rs. 1,500,000,000 (vaibelchhe za sawmnga) pek an ni a. Kum 2022-2023-ah cheng veibelchhe 150 pek leh an ni. Kum 2023-2024 atana cheng vaibelchhe 150 dah fel sa erawh chu MNF sorkar khan a hmang hman ta lo a. Chuti chungin kuthnathawktute bulṭanna tur leh an intunna tura ṭanpuina pek zat chu avaiin Rs. 3,249,750,000 (vaibelchhe zathum sawm hnih pali maktaduai kua nuai sawmsarih panga) a ni.
“Hetiang hi Covid-19 hripuiin kan ram Economy a tihchhiat kârah pawh MNF sorkarin kuthnathawktute ipte-a pawisa a thun dan a ni a. Hetih laia Pu Lalduhoma’n cheng vaibelchhe 90.4 sawhthing lei nan an hmang chu, ti ṭha ber anga a insawi hi, MNF chuan inngaihtuah nawn se a duh hle.
“RTI zawhna Agriculture department-in a chhan dan chuan ZPM sorkar hian nikum 2024-a kuthnathawktute Sawhthing an chin tir zat chu quintal 2,74,173 a ni a, thar chhuak tura a beisei zat chu quintal 14,83,256 a ni. June ni 27, 2025 thlenga an lei zat erawh chu quintal 2,33,604 chauh a ni a. Hei hi thar chhuak tura beisei zat aṭanga chhûtin za zelah sawm leh panga (15.7%) chauh an lei sak tihna a ni a! Sawhthing lei kawngah ZPM sorkar a ‘fail’ chiang hle a, ‘Pass mark’ an hmu pha lo tih hi MNF chuan Chief Minister, Pu Lalduhoma leh a kaihhruai sorkar hi a hriat tir duh a ni,” an ti bawk.
