Vawiin Dated 3rd July 2025, 10:30 am khan pawl pali te Mizoram Transformation Movement (MTM), Centre for Environment and Social Justice (CESJ), Mizoram First (MF), and the Citizens Alliance for Truth and Social Justice (CATAJ) te chuan NHIDCL Executive Director Mr Virendra Kumar Jakhar chu a office ah an hmu.
NHIDCL hian Mizoram a National Highway Km 921 lai siam an enkawl mek a. He Meeting ah hian Sairang to Kawnpui kawng dinhmun chhiat lutuk avanga motor hial a tluk thin thu leh kawng tha lo avanga Mizoram chhunga khawsak a buai thu sawi a ni a. Hemi chungchangah hian thu chiang zawk leh hna thawh an tum dan te zawt fiahin, tha tak leh rang takin, motor kal harsatna a awm lohna tura hma la turin ngenna leh hriattirna an pe a ni.
NHIDCL Executive Director hian kawng chhiat thu a hriat thu a sawi a, siam turin hma an lak mek thu leh theihtawk chhuah an tum thu pawh a sawi a ni. Amaherawhchu fur ruahtui tlak chhung hi chuan black topping chu an tih theih rih dawn loh tur a sawi.
Mizoram PWD hnen atangin Khamrang leh Kawnpui inkar leh Bilkhawthlir leh Kolasib inkar te hi an enkawl tura la mai tur an nih laiin an la lak chiah loh thu a sawi a, lak thuai erawh an tum thu a sawi.
Kawng siam kawnga harsatna an tawh zingah Forest clearance kum rei tak chhung an neih loh thu leh, tunah chuan an neih tawh thu a sawi a. Amaherawhchu thing ding te hi Forest departmentin an kih leh senghawi tur a nih avangin tun thlengin hna tak tak an la thawh theih loh thu a sawi.
