Mamit district chu a len avangin a thang chak loa, Zawlnuama district siam belh a tul tih Zawlnuam District Demand Committee chuan an sawi a. Khawzawl district leh Hnahthial district ai pawhin a huamchhungah khua a tam zawk tih an sawi.
Kumin June 7-a Zawlnuam Joint Village Council kaihhruaia Langkaih ruama VC, NGO, political party hrang hrang kalkhawm chuan Zawlnuam District Demand Committee a din tih sawiin, Mamit district thendarh a, Zawlnuam district piantir a tul tawh zia chu Mizoram sawrkarin hriatpui se an duh tih an sawi.
An duh chhan hrang hrang an sawi a. Chhim lam district, khaw te reuh te te tamna tih lohah chuan Mamit district chu a lian fal hle a, inkalpawhna a that loh bawk avangin mipui tan thiltih a harsa a, veivah a hautak a, senso a sang a, mipui tawrhna chhawk zangkhai turin Mamit district thendarh a tul tawh tih an sawi a ni.
Hnahthial district puma khaw awm zat 32 aiin Zawlnuam RD Block chauha khaw awm zat a tam zawk a; ZawInuam RD Block leh Kawrtethawveng RD Block belhkhawm chu tuna district thenkhat ai hian a lian zawk tih an sawi.
‘Zawlnuam RD Block-a khaw engemawzat, Mamit hnaih lama awmte tan, Zawlnuam RD Block dawr a harsat avangin Zawlnuam RD Block chu Zone I leh II a then niin, Zone-II hi DRDO Mamit atanga enkawl a ni. Hetiang bawk hian, Langkaih ruam leh Hachhek tlangdung tan Mamit dawr hi thil awlai lo tak a ni ve tho a ni,’ an ti.
Zawlnuam RD Block (Zone-I) ah khaw 19, Kawrtethawveng Block-a khaw 21 nen, a vaiin khaw 40 hi Zawlnuam district-a awm thei tur nia a lan thu an sawi a. Zawlnuam RD Block thensawm hnuah pawh Kawrtethawveng RD Block nen chuan Hnahthial district-a khaw awm zat (32) leh Khawzawl district-a khaw zat (38) aiin a la tam zawk tho tih an sawi bawk.
State pathum inrinaa awm, khawthlang ruam, chawikan tulna leh ramri humhalhna atana a pawimawh zia hriatthiam pui a, an beiseina tihhlawhtlin sak ngei turin Mizoram sawrkar an ngen tih an sawi a ni.
Mamit district thendarh a, Zawlnuam-a district headquarters dah a remchanna chhan an sawi dan:
# Zawlnuam town chhungah sawrkar ram awl a la tam a, a khaw thleng a remin leimin hlauhawm a awm loa, khaw zauh belh zelna tur hmun a rem bawk.
# Zawlnuam hi tui lak tur tha tamna a ni a, khaw thang zel tur ngaihtuahin tui lamah harsatna a awm loang. Khawl hmang lo (gravitation) pawha tui lak belh fe tur a awm a ni.
# Inter-state boundary-a awm, main road-ah boundary hnai lutuk si lo a ni a, security thilah a location a fuh a, hun harsa tawh palhah pawh state pum tan thlamuanna tham a nih a rinawm. Helai hmun tih changtlun a, sawrkar rorelna hun hnaih hi Mizoram khawthlang lam ramri venhimna atan thil pawimawh tak a ni.
# Tripura leh Assam hlat lo taka awm a nih avangin, Hachhek tlangdung khua tan Mamit ai chuan Zawlnuam district-a beh hi a remchang zawk a, sumdawnna thilah pawh remchanna tam tak a awm a ni.
# Kawrtethawveng piah lam Rajivnagar ruam zawng zawng tan thlengin, Mizoram chhung kawngpui bakah Zampui tlangdung (Tripura) atangin kawngpui tha leh nuam takah Zawlnuam a thlen theih a, an tan pawh remchanna tam tak a awm.
# Zawlnuam hi lui lian ve tak Langkaih kam phairuama awm a ni a, a leilung a tha a, thlai, thei adt. ah mihring tam tham chawm theihna ram tha a awm a, agriculture lam tihhmasawnna remchang tak a ni bawk ang.
