Mizoram Pradesh Congress Committee chuan vawiin khan Vanapa Hall kawt-ah ‘India Danpui Humhimna leh Mizoram Mipui Thlavang Hauhna’ hun an hmang a, Bhavan thlenga kawhzawhna an nei bawk. He hun hi MPCC Treasurer Dr. Lalmalsawma Nghaka chuan a kaihruai a ni.
John Siamkunga, PAC member leh GS ni bawk chuan thu sawiin, “BJP hian Indira Gandhi hova Emergency an puang kha India Constitution thahna ni ‘Samvidhan Hatya Diwas’ tiin an kova, a lawmna hun pawh Mizoramah ngei pawh an hmang anih kha. BJP hian engtin nge Constitution thahna tiin engtin nge an sawi theih zawk? India ram hi Socialist pattern in kan kal a, Socialist pattern a kan kal vang hian ni za inhlawhna te, food security thleng hian kan dawn phah a ni. Sakhaw tihbik nei lo Secular ram kan ni a, chuvang chuan kan zavaiin kan sakhua theuh zalen takin kan be thei a ni.
“CAA te kha amend phal loh a ni a, mahse an amend pui tlat a. Christian te phei chu foreign sakhua an ti a, min telh duh lo a ni. Hmanlai a lo awm tawh Muslim pawh an telh duh lo a ni. India ram Hitdutva a siam duh tu chu RSS te an ni a, an ni hian Kriatian te hi min nekchep reng a ni. Ti hian zawi zawiin min nekchep reng anga, an duh chu engtikah emaw chuan an ti dawn tho tho a ni.
“Rahul Gandhi thubuai an siamsakna National Heralh Case hi party thil pawh a ni lova, a pu ta an chhawm a ni. He thil party pawn lam pang thil, diklo pawh awm lo hmangin an bei zui chiam mai a ni.
“Tuna kan sawrkar lai mek ZPM pawh hian engtikah emaw BJP zawm hun an la nei dawn tho. An intiamna ang hian ti se, kan ti lovang an tih chu tilo mai se. Kan hotupa ber pawh hian motor pakhat bak kawl lo turin a insawi a, mahse a kawl tam ber an ni. Kan Home Minister ngei pawh hian motor pakhat bak an kawl loh tur thu a sawi anih kha. Inrenchemna kum an ti a, a hming an phuah sual em ni ka ti, GST khawn a tlahniam a, Thailand Health Care zirin mi 20 dawn an kal a, nuaih 20 dawn an hmang te kha inrenchem nen a inmil lo.
“Tunah hian GST khawn a tlahniam zel a, hetiang reng chuan sawrkar hi a kal reng thei dawn lo. An tih theih awmchhun chu Central-a BJP sawrkar tlawn a ni a, BJP hnuaiah hian an intulut dawn tho tho” tiin a sawi.
TT Zothansanga, PAC member leh Ex-minister pawhin thusawina a neihah, “Tukina ZPM Thalai PR kha ka lo hmu a, Congress leh MNF sawrkar flagship programe khan mipui a thleng pha lo an ti a, MNF chu ka sawi thei lova, Congress flagship programe NLUP khan mipui a thleng pha a ni. Kum 2010 khan an pu Lalduhoma hian NLUP hian mipui a thlengphak a, hei vang hian Congress party hi thawhpui kan chak chhan chu a ni a lo ti tawh a, an pu te thusawi tawh pawh hre lova a kalh zawnga thuchhuah an siam hi lo inenfiah rawh se.
“ZPM sawrkar hian an manifesto ah Contract hna a tam thei ang ber open tender in kan ti ang an ti. Kan Home Minister ngei pawh in contract hna chu contractor chauhin an thawk tawh ang a ti bawk. An han sawrkar a Sakawrtuichhun kawng restricted tender in an han pe a, a changtu minister ngei pawhin a lo hre lo ani. A hnuah departmental work in an han ti leh a ZPM party hruaitu pakhat Work Supervisor hming puin an thawh tir leh ta tho ani.
“Supply Department ah buhfai tender an han chhuah a, a chhang hniam ber RL Store te pe lovin a chhang sang zawk an han pe leh tlat a. He ta tang ringawt pawh hian sum engemawzat a kal ral a ni.
“ZPM hian Empanelled Farm hmanga sum siam an tum nasa khawp mai. An sawrkar hnu lawk a Cabinet Meeting ah chuan engtinnge Consultation Farm hi kan hawn leh ang an tia. A hnu lawkah Constancy Farm hawng tura a tul te hman hmawh takin an siam fel a. Tunah chuan Consultancy Firm thar 328 kan nei tawh a ni.
“Kut hnathawktute pualin sum dah a ni ang an ti a. Kum 2023 ah vaibelchhe 110 an dah a, nikum leh kuminah kut hnathawktute tan cheng khatmah an dah lo.
“Sawhthing chungchangah Mizoram chhung a sawhthing thar beisei zat Assembly House a zawhna Minister in a chhan dan chuan quintals 14,83,253 thar anih beisei thu Assembly chhannah tarlan a ni. Kumin a sawhthing lei zat hi quitals 2,33,604 anih thu tarlan a ni a. Mizoram sawhthing thar a tanga sawrkar sawhthing leizat hi 15% vel ani.
“Taxation Department chung changah Taxation Minister kan CM hian Taxation Office hi a la tlawh lo, hei hian GST tlak hniam chhanah hian a changtu kan CM hian a ngaihthah vang ani tih chiang takin a lang.
“Sawhthing kan lei zo vek an tih te hi, khaw li khaw nga an leisak a, Youtuber an kova, media ah lei zo vek angin an insawi a ni. Hei hi lo hre rawh u, sawhthing hi khaw li nga vel chauh an leizawhsak a ni tih hi,” a ti.
John Rotluangliana, PAC member leh Ex-Minister pawhin thusawina a nei a. “Vawiin ni ang em em a sum lengvak tlem hi a la awm lo. Ram chhiah an ti to a, buhfai man an ti to a, petrol leh diesel man an ti to bawk a, chuti chung chuan sum lengvak a tlem em avangin mipui an harsa a ni. Nimin lawk khan MNF hovin ZPM PR an chhanna mipui kutah sum SEDP atangin kan pe tiin an sawi a, Congress chuan NLUP atangin cheng nuaih chuang chhungkaw nuaihkhat singhnih chuang eizawnna bul tan nan kan pe a ni.
“ZPM hotute hian lirthei man tovah kan chuang ve lovang an ti a, mahse a man to to an lei leh a, an sawi ang hian an awm lo lutuk hi an harh a ngai a ni.
“ZPM sorkarah hian a miṭha ṭha hi an chuang rum mai a ni. PWD minister atan hian Pu Lalmuanpuia Punte leh Pu TBCA te hi awm se kan zia zawk ang.
“ZPM sorkar hian chhiah tihsan theih zawng zawng an ti sang a. Sahuana zawngte en man thlengin an ti sang.
“He sawrkar hian BJP a la zawm loh chhan chu mipui an la zah vang a ni. Inthlan hma khan BJP sum tamtak an dawng an ti a, inthlan hma lawkah khan sum an ngah thut anih kha. Hmanni khan kan Health Minister chuan chhim lama a zinnnaah Mizoram atanga BJP hnawhchhuah a tul thu a sawi a, BJP hian central lamah khuan an lo hnawtchhuak ve ang tih a hlauhawm hle mai.
“Airport chungchangah pawh hian kan CM hian Airforce ho in an offer that thu a sawi thin a, an buaipui khawp mai. MNF pawh khan Kamrula hovin an buaipui khawp mai. Congress in Airport khu kan sak a ni a, a laih tan dawn khan party hrang hrang sawmin tawngtaiin bul kan tan a, khatah khan MNF kha an tel ve duh lo a ni.
“MNF future chu ‘Buai’ a ni. An President hi thlak dawn se, an buai dawn si a. Thlak lo pawh ni se an buai tho si a. Buai bak hmabak an nei lo.
“MNF khan Airport Cute ber kan siam dawn an ti a, Kamrula hovin an han che tak tak a, India rama Airport liang hniam ber an siam. Kolkata Airport te khu a liang a sang teh a nia.” tiin a sawi bawk.
