Chief Minister charge la mektu Home Minister K.Sapdanga chuan vawiin khan Chief Secretary Conference Hall-ah chanchinthar lakhawmtute kawmin, “Chakma Autonomous District Council chu Dated 7th July 2025 (nimin) khan thiah a lo ni taa, Governor rules hnuaiah dah a ni a. Hemi chungchangah hian, mipuite tana thil ngaihsual palh theih a awma hriat a vangin, thil awmdan sawifiah hi a tula hriat a ni,” tiin a hnuai a mi ang hian an lo hmalak tawhnate leh thil awm dan a sawifiah.
“Chakma Autionomous District Council-ah hian elected member 20 an awm a. Chung zinga member 16 chuan tun hnaiah ZPM party an zawm a. Heng MDC 16-te hian ZPM Legislature party insiamin, CADC sorkar an siam thei a ni tih June 16,2025 khan an lantir a ni.
“Heng MDC 16-te hi Aizawlah lo pheiin, Hon’ble Governor hmaah June 18, 2025 khan an inlan a, MADC-ah ZPM Council sorkar an siam theih thu an thlen a, siamtir turin an dil nghal a ni.
“Chief Minister Pu Lalduhoma pawhin Hon’ble Governor hnenah, member 16 nei ZPM Legislature Party chu CADC-ah sorkar siamtir mai tha a tih thu a lo thlen tawh bawk a ni.
“Hon’ble Governor-in Council of Ministers ngaihdan ziaka thlen tura a phut angin Council of Ministers chuan lungrual takin, popular sorkar siam thei an awm chuan Council thiah chu tha a tih loh thu leh, member 16 nei ZPM MDC-te chu CADC-ah sorkar siamtir mai turin, July 4, 2025 khan Hon’ble Governor hnenah ziakin Council of Ministers ngaihdan thlen a ni.
“Hon’ble Governor-in Council of Minister ngaihdan ziaka thlen tura a dil hnuah, Council of Ministers ngaihdan ni lo zawnga thutlukna a siam leh ta tho si hi a vanduaithlak kan ti tak zet a, Democracy zahawmna tihmelhem thei ni hialin kan hria. Hetih lai hian, CADC thiah chungchanga thutlukna siam theitu chu Governor a ni a, a duh anga thutlukna a siam a thiang tih kan hria.
“Chuvangin, Hon’ble Governor hian CADC a thiahna Notification No Α.43016/3/2023-DC&MA(C)/Pt Dated Aizawl the 7th July, 2025 hi ngaihtuah nawn leh turin Council of Ministers chuan a duh hle a ni,” a ti.