Congress party Spoesperson Dr.Lallianchhunga chuan, “ZPM ENCHHIN SORKAR hi a pawng ataka sawisel kan duh lo va. Mahse, anmahni ngei pawhin Eptu party an nih laia nasa taka an sawisel ṭhin, ENCHHIN SORKAR an din hnua an KALPHUNG THAR felhlel tak te hi finfiahna nen thlap tarlan zel hi Eptu Party nihna anga kan mawhphurhna a ni a. Mizoram mipuite hian thudik an hriat a, eng ang ENCHHIN SORKAR nge kan hrawn mek, an sawi angin an awm em, ‘kan ti ang’ an tih an ti em? tihte kan hriatfiah theihna turin Congress party chuan theihtawp a chhuah zel dawn a ni,” a ti.
Vawiin khan AIzawl Press Club-ah Dr.Lallianchhunga chuan chanchinthar lakhawmtute kawmin, “Eptu party an nih laia ZPM party hotute’n an sawisel nasat em em chu MNF hnuaia ‘Restricted Tender’ an pek dan kha a ni. Mizoram mipui mak tih khawpin MNF sorkar khan a duhsak zawng te RESTRICTED TENDER hmangin hna a pe ṭeuh ṭeuh a. Congress party leh ZPM ten nasa takin MNF sorkar hnuaia Restricted Tender inpek dan kha kan sawisel reng a. Congress party phei chuan khatih laia kan President Pu Lalsawta hovin Press Conference kan nei a, Danin a phalsak chinah chauh Restricted Tender chhuah a nih tur thu kan puang hial a ni.
“ZPM Leader Pu Lalduhoma pawhin MNF sorkar hnuaia Restricted Tender inpek dan chu nasa taka sawiselin, MNF sorkar hnuaia sum leh pai harsatna nen a sawi zawm a, ‘Restricted Tender ringawt pawh kan tih ve loh hian kan sum dinhmun chu, chu chuan nasa takin a siam tha nghal ringawt a ni’ (24th Aug.2023 ZPM Campaign Kick Off @ Vanapa Hall) a ti a. Assembly House zahawm tak chhungah ngei pawh ZPM Leader Pu Lalduhoma hian, ‘Restricted Tender inpek hian dan 5 pawimawh tak tak a bawhchhia a ni. Pakhatna, Rule 162 General Financial Rules; pahnihna, Rule 16 Public Procurement Rules; pathumna, Central Vigilance Commission Circular No.04/04/21; palina, Art. 14 of Indian Constitution; pangana, Supreme Court Ruling SPL Civil No.10174 of 2006. Heng zawng zawng hi Mizorama Contract kan inpek dan hian a bawhchhe par par a…’ a ti a ni.
“Hetiang khawpa an sawisel hi ZPM ENCHHIN SORKAR chuan sorkar kal tawhte aia uar leh nasa zawkin a kalpui ta hmiah hmiah mai a ni. Sorkar document kan hmuh theih aṭanga a lan danin April 17, 2025 khan SASCI 2024-25 hnuaia hna cheng vbch 629.17 man chu Restricted Tender hmanga an duhsak zawng te an thawh tir theihna turin Department te chu BLANKET APPROVAL a pe a, hei hi Eptu party an nih laia an thusawi nen a inkalh chiang hle. RTI chhanna aṭanga a lan danin ZPM ENCHHIN SORKAR pian aṭanga April 29,2025 thleng khan Restricted Tender hmangin hna lian tak tak 47, cheng vbch 316.38 (Rs.3,16,38,35,821) chuang man a pe chhuak tawh a ni.
“Kum 2023 MLA Inthlanpuia ZPM Manifesto ‘SUSTAINABLE DEVELOPMENT & REFORM POLICY (SDRP) Chapter IV (B) ah ‘Contract hnate a tam thei ang ber Open Tender-a koh ṭhin a ni ang’ tih a awm a. Chapter IV (C) ah, ‘Loh theih loha Restricted Tender-a thawh ngai a awm a nih pawhin, dik taka dàn zàwm thlapa tih a ni ang,’ an ti bawk a ni. An Party Manifesto ngei pawh palzuta ZPM ENCHHIN SORKAR in Restricted Tender a kalpui dan hian sorkar belhchiandawl leh rintlak tak a nih loh zia a tilang chiang hle a ni.
“Inthlan Campaign laia an thusawi ṭhin te ringin, mipuiin ENCHHIN atan ZPM an thlang tling a. Thuneihna an chan hnu hian an duh phawt chuan Campaign laia an thusawi dan leh Manifesto a an ziah dan angin an kal thei tih a chiang hle; hei hi anmahni thlang tlingtu mipuite beisei dan pawh a ni a. Mahni thusawi leh intiamna Manifesto phatsana thil tih hi KALPHUNG THAR an tih chu em ni? tih ZPM ENCHHIN SORKAR hi kan zawt a ni,” a ti bawk.
