Vawiin July 18, 2025 Zirtawpni hian Mizoram Pradesh Congress Committee chuan Congress Bhavan-ah Friday Political Session leh member thar lawmluh hun an hmang a. MPCC President Lal Thanzara’n party zawm tharte a lawmlut.
MPCC President Lal Thanzara chuan, “Politics kalsual avangin kan ramah kum 20 chhung hrekin kan awm tawh a. Vawiinah hian eng party nge kan zawm dawn tih mipuiin ngun taka an ngaihtuah a ngai tawh a ni.
“Congress party hi India rama sakhaw zalenna keng kawhtu a ni a, Sakhaw zalenna hi malsawnna min thlentu a ni. MNF leh ZPM ten a ruka an zawm mek hnuaiah hian Chanchintha hril a harsa ta em em a. Chuvangin, keini Mizo Kristiante hian Chanchintha hril dodaltu party te zawm lo a, kan awmna tur dik tak Congress-ah rawn lut turin ka sawm che u a ni.
“Sum leh pai beiseia tlan vak vak hi a hun tawh lo. Kan thalai beidawng tam tak ruihhlo ah an kal mek a, hetiang reng reng hian kan ram hi sawisakin a awm mek a ni.
“Kan hriat theuh angin kan ramah hian drug tawlh a hluar em em a, ka thalai tam takin an ngaih phah a. Kan thalai tam takin ruihhlo an pan dul dul hmuh tur a tam ta a. Nupa inthen tam berna state kan ni mek tia sawi pawh an awm a. Sum leng vak a awm lo a, thlai thar zuar ten an thlai an hralh hlei thei lo va. In rawk leh inthah chungchangte kan hre tam em em a ni.
“Heng zawng zawng hi a chhan ngaihtuah a ngai ta hle. MNF in min sawp chhiat vek hnuah ZPM ten BJP malsawmna dawngin an campaign a, a ruka BJP an thawhpui avangin thlarau malsawmna kan beisei thei lo. Chanchin Tha hril dodaltute nena inthlunzawm kan nih chuan kan ram hian Pathian malsawmna kan chan a rinawm loh.
“A pawng apuiin BJP hi an hlauhawm loha kan ngai a nih pawhin an phena awm, RSS, VHP, Bajrang Dal leh an thurualpui dangte hian kan missionary te kawng an dal a. BJP thawhpui ve ngai lo tur Congress hi zawm turin kohhran rawngbawltu, Revival Speaker chawl tawh te pawh ka sawm duh a ni.
“Heng boruak chhia zawng zawng atanga tal chhuaka Chung lam malsawmna kan dawn theihna turin, ram tha zawk duhtu mi kan awm a nih chuan Congress-ah rawn lut zel ula tiin ka sawm che u a ni.” tiin a sawi.
MPCC political session hi Lalthankhuma, Secretary MPCC chuan a kaihruai a, Samuel Lalvawng, Secretary MPCC, Robert Zotinkhuma Ralte, General Secretary MPYCC leh Robert Lalzarliana, Aizawl East 1, block 1 President ten report an pe a. Benjamin Thansanga, General Secretary chuan thusawina a nei bawk.
He inlawmluhna programme-ah hian ZPM atangin mi 3, MNF atangin mi 4 leh Neutral atangin mi 1 Congress-ah an lut a ni.
