Aizawl May 9 : Vawiin khan ZPM chuan chhung inkhawm hun an hmang a; chhung inkhawm hi Er.Lalhmingliana, General Secretary in a kaihruai a; Pu TBC Lalvenchhunga, PAC member-in thu a sawi a. Tunhnaia hmun hranga zin chhuak ten report ngaihnawm tak tak pein, hmun hrang hrangah ZPM in hma kan sawn nasat thu an sawi a ni.
TBC Lalvenchhunga chuan, “MADC a kan hmasawnna hi a ropui a, engmah lova bultan kan ni a. Hun rei lote chhungin tun dinhmun hi kan thleng thei a, kum 2023-ah kan inthlang dawn a, ZPM hmalam hun a eng hle a ni,” a ti.
Kum 2023 a inthlanpui lo awm tur chungchang sawiin, “Kum 2023-ah genral election kan hmachhawn dawn a, hmun thenkhatah chuan chutizat chu sen a ngai ang, tih report te kan dawng leh tan tawh a. Sum leh pai hmangin keini hi kan in leitling ve thei lovang. Lo inleitling thei kan awm a nih pawhin rorelna tha hi engtikah mah kan din thei ngai lovang. Kei chuan hetiang politics a tel ai chuan tel ve loh hi ka thlang,”a ti a. “Kan tan kan thawk lo tih kan hriat a ngai a, tute emaw pahnih khat lek tan kan thawk lo tih kan hriat a ngai bawk. He ram tluchhe mek tung ding turte, hun rei tak atanga he ram hmalam hun tha zawk beiseina nena thlir ngat ngat tute, theihtawp chhuaha hnathawk chung pawha politics tha lo tuar a, beiseina mei mit lek lek tawh te khaichhuak tur hian theihtawp kan chhuah a ngai a ni. Keini’n bul kan tan a ngai a, he ram siamtha tur hian hma hruaitu kan nih a ngai a, huaisen taka kan kal a ngai a ni,”a ti bawk.
TBC Lalvenchhunga chuan, “Politics hi keimahni nunah a lang tur a ni a, chu chu mipuiin an hmu tur a ni. Tute emaw hmanga politics hi khelh tur a ni lo. Politics-ah tha lo lai kan hmu a, a siam that dan tur ngaihtuah a ngai a, chumi ngaihtuah chuang si lova politics khelh hian awmzia a nei lo. Ram siam that tum chuan a ngaihtuahna zawng zawngin ram siam that dan tur a ngaihtuah tur a ni. Politics hi game chi khat, mipuite buma mahni inhaivur tumna game a ni lo tih kan hriat a ngai a ni. Pulpit tlang atanga thu tha tak an sawi ringawtah kan innghat ang tih a hlauhawm a. A tha ti a awmhmun atanga lo ‘amen’ ringawt tur kan ni lo, theihtawp chhuaha kan thawh a ngai a, kan chet chhuah a ngai a ni,”a ti bawk.
