Excise & Narcotics Department chuan 19th July, 2025, (Inrinni) zan dar 11:10 khan Champhai District, Zokhawthar khaw panna bul, New Hruaikawn Road-ah Methamphetamine Kg 10 & Gram 100 (Tablet 10,100) leh a neitu nia puh –Lunminlalzo (34) s/o G. T. Zo, Churachandpur, Manipur, tuna Champhai Vengthara khawsa mek nia inchhal chu an man. Methamphetamine phurhna atana a hman lirthei, Maruti 800 car, Registration No. MZ04 – 8564 pawh hrensak nghal a ni.
20th July, 2025 (Pathianni) zing dar 8:45 khan Champhai, Mualbawk-ah heng Methamphetamine tawlh ruknaa inhnamhnawiha puh – Christy Hmingthanzami (19) d/o R. Lalngaizuala, Champhai Vengthar-a khawsa nia inchhal pawh man tel ani bawk. Heng Methamphetamine te hi state pawna hralh tur nia rin a ni.
Methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, July ni 20, 2025 khan Court-ah hruai nghal an ni. Court-in thiam loh a chanter chuan Kum 10 atanga kum 20 thleng Jail-a tantir leh pawisa `1,00,000 atanga `2,00,000 thleng chawia tel bawka hrem theih an ni.
Tin, tunlai hian Excise & Narcotics Department chuan Aizawl mai bakah District capital hrang hrangah chhun leh zanah ruihhlo ngaite vaiin beihpui an thlak a.
Ruihhlo ngaite thahnem tak hruaikhawmin an zilh thin a, an chhungte remtihna lak hnuah Home hrang hrangah te an dah a, thenkhatte chu Court thupek angin vantlang hmun pawimawh thenfai tir an ni a. Tin, tunlaia Sawrkarin ruihhlo ngaite puala enkawlna a buatsaih, Hulhliap Short Stay Centre for Addicts-ah te dah an ni nual bawk.
