Joint Civil Society of Mizoram (JCM) hnuaia heng Pawl hrang hrang – Mizoram Transformation Movement (MTM), Centre for Environment and Social Justice (CESJ), Mizoram First (MF), leh Citizens Alliance for Truth and Justice (CATAJ) te leh Mizoram Tippers Association, Mizoram Truck Drivers Association, All Mizoram Commercial Tippers Association, Fak Hlawh Lo Valrual, leh YMA leh Village Council aiawhte thenkhatte chuan July 19, 2025 khan Kawnpui atanga Sairang National Highway 306 & 06 dinhmun enfiahna hun a hmun ah kal in an nei a, he kawngpui hi Kawnpui atangin Sairang thlengin leh hemi ni hian an zawh chhuak vek a ni.
JCM Convener Dr. Lalbiakmawia Ngente chuan he an kawng tlawh chungchangah hian vawiin khan Aizawl Press Club-ah chanchinthar lakhawmtute a kawm a, “Kawngpui chhiat zia a takin a hmunah kan hmu a. He kawngpui pawimawh km 40 vel, Mizoram ‘Life Line’ hi lirthei tan kal rual loh a ni tih a lang. Khuar thuk tak tak leh tuitling te, nal tak tak te awm nualin , motor tlu an awm nual bakah truck tam tak kal thei lovin ni tam tak chhung an awm tawh a, hei hian Mizoram mipui leh hnathawh te, sumdawngte nitin nunphung a ti buai tak meuh a ni.
“He kawng dinhmun chhe tak avang hian Mizoram Oil Tanker Drivers Association chuan July 19, 2025 zing atangin tlan loh an rel a, Drivers leh Owners Association tam tak pawhin an thlawp bawk a ni. Hei hian tuialhthei leh mipui nitin mamawh ah harsatna nasa tak a thlen nghal bawk.
“Kawngpui thalo hian mipui nunphung a tih bahlah mai bakah India ram state pakhat kan nih angin National Security atan a pawi hle in kan hria a, Mizoram hi hian Myanmar leh Bangladesh te nen international border neiin China pawh a hnaih hle a, ramdang mi raltlan mi tam tak an awm mek lai a ni nen; he kawng hi Central Government tan pawh ngaihthah chi a ni lo hlein kan hria a ni,” a ti.
Kawnpui to Sairang an tlawh atanga an hmuh leh hriatte a hnuai a mi ang hian JCM hotute chuan an sawi bawk.
1. He kawngpui km 40 vel zet hi a taka hmuhin a chhe tak zet a. Tanker te leh motor dang te pawh an tlan duh lo/thei lo hi a awm tak hle a ni. Khuar thuk tak tak te, tui tling thuk tak te, chirhdiak leh kawng nal em em te a awm a, motor khalh tute tan anmahni nunna leh motor tan a hlauhawmin a mangan thlak tak zet a, motor tlu a awm nual bawk.
2. He kawng hi a tluan a kan zawh lai hian siam tura hnathawk awm dan kan thlithlai a. Excavator pathum leh JCB 1 hnathawk kan hmu a, mihring hnathawktu phei chu mi 5 vel chiah kan hmu a ni.
Heti taka buaina a awm lai hian a hna kengkawh mektu NHIDCL hian rang taka siam tumna an nei lo em ni aw tih theih a ni. Excavator te pawh hi a chhe lai siam tur vek ni lovin motor tang nawr chhuahna atan tea dah an niin a lang. Concrete kawng awm siam mek te chu a la tlem hle a ni.
3. Truck ding ngir khup in kalkawng a tih pin vek avangin Khamrang leh a chhehvel khaw mipuiten harsatna tam tak an tawk a, chak lakna tur motor a kal thei lova; damlo tan damdawiin pan a harsain office dawr tur te pawhin ke a kal te a ngai a, motor tang tlawmngaia buaipuiin an hah hle a ni.
4. Kalkawng ah Truck tangkhang za tam tak an awm a, lirthei a eizawng tuten an tuar nasa hle. Driver leh handyman te ei tur neilo an tam hlei a, intihfaina tha a awm loh avangin an hriselna pawhin a tuar thei mai dawn a ni. Khamrang khuaah chuan nitin mamawh an harsa hle a, damdawi in leh Bank pan tur pawhin buaithlak hle.
5. Kawng chhia hi thui viau mahse tlan theih loh tawpna, khuar thuk lutuk lai chu a sei berah 1 km bak a ni lovin kan hria a. Khuar thuk lutuk pawh hi hmun 6 vel bakah a awm lo niin a lang. Kawng hi mam leh hnum turin tumahin an beisei lova, mahse kal theih a siam erawh mi zawng zawng beisei a ni. Hetianga siam tur hian thil harsa lutuk niin a lang lova, ni tam pawh a ngai lo niin a lang.
JCM ten kawng siam tha tur hian rawtna a hnuai a mi ang hian an siam bawk.
1. Emergency Repair:
Kawng chhiat em em na hmun hi a vaiin 1 km aia thui ni lovin kan hria a, heng hmun te hi rang takin NHIDCL hian an siam tur a ni. An siam hun chhung tur leh an siam zawh hun tur thlengin mipui min hriattir vek kan phut a ni.
2. State Highway (Kawnpui to Durtlang) kawnga kal dan ngaihtuah : Hetiang hun harsa hi a hmain kan ram hian kan lo tawk tawh a, chung hunah chuan tlang kawng, (Kawnpui to Durtlang) ah hian a inchhawk a kal dan ngaihtuah a ni thin. Chutiang bawk chuan sawrkar hian mipui harsatna tih tlem nan ruahmanna siam thuai se.
3. Traffic Regulation leh Management: Kawng chhiatna hmun hi siam a nih thuai theihna turin traffic tha taka enkawl a ngai a, hemi kawngah hian Sorkarin hma la se, rang zawkin kawng chhia a siamtuten an siam theiin a rinawm.
4. Humanitarian Relief: Khamrang leh a chhehvel khua te leh Truck a tang mek te hi an tang zel a nih chuan an mamawh eitur leh thil dang ngaihtuah sak thuai a tul a ni.
JCM hruaitute chuan, “Mizoram hi India ram bung khat niin kum 38 State kan nih tawh a, chuvangin a ram mipuite hian kawng tha zawk hi kan phu kan ti a. Kawng hi mipui tan hmasawnna, inpumkhatna, himna leh damna thleng nghawngtu a nih avangin a enkawltute hian ang ngaihthah tur a ni lo. Chuvangin kawng tha zawka siam thei tute zawng zawng a rang thei ang bera kawng tha zawk mipuite pe turin kan beiseiin kan ngen a.
“Joint Civil Society of Mizoram te chuan Central Sorkar, a bik takin Ministry of Road Transport & Highways (MoRTH) leh NHIDCL te, Mizoram Sorkar te rang taka hma la turin kan ngen tak meuh a. Kawng tha neih hi mipuite chanvo (Fundamental Rights) tura India Danpui Article 21 in a tih a ni tih hria a mipuite an chanvo min pe turin kan phut tlat a ni,” an ti bawk.
